ސްޕެނިޝް ލަލީގާގައި ހޮނިހިރު ދުވަހުގެ ރޭ އަމިއްލަ ދަނޑުގައި 2-0 ގެ ނަތީޖާއަކުން ވިލަރެއާލް ބަލިކޮށް ރެއާލް މެޑްރިޑުން އިތުރަށް އެއްމެޗު ކުޅެ، ޕޮއިންޓްގެ ގޮތުން ބާސެލޯނާ އާއި އަރައި ހަމަކޮށްފި އެވެ.

ލީގުގައި ރެއާލް މެޑްރިޑް އެންމެފަހުން ކުޅުނު މެޗުގައި އެތްލެޓިކޯ މެޑްރިޑާއި ވާދަކޮށް 1-1 ގެ ނަތީޖާއަކުން އެއްވަރުވެފައިވާއިރު، ވިލަރެއާލް އެންމެ ފަހުން ކުޅުނު މެޗުގައި އެޓީމުން ވަނީ 3-1 ގެ ނަތީޖާއަކުން ލަސް ޕަލަމާ ބަލިކޮށްފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ރެއާލް މެޑްރިޑުން މެޗުގެ ލީޑުހޯދީ ފުރަތަމަ ހާފުގެ 14 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ފެޑަރީކޯ ވަލްވޭޑޭ އެވެ. އަދި ރެއާލް މެޑްރިޑުން ލީޑު ފުޅާކުރި ލަނޑު ދެވަނަ ހާފުގެ 73 ވަނަ މިނެޓުގައި ކާމިޔާބުކޮށްދިނީ ފޯވާޑް ވިނީޝިއަސް ޖޫނިއަރ އެވެ.

Advertisement

މީގެ އިތުރުން މެޗުގެ 79 ވަނަ މިނެޓުގައި ވިނީޝިއަސްއަށް އަނިޔާވެގެން ބަދަލުކުރިއިރު، މެޗުގެ އިތުރު ވަގުތުގެ ތެރޭގައި ރެއާލްގެ ޑިފެންޑަރު ޑެނީ ކަވަހާލްއަށް ވެސް ވަނީ އަނިޔާވެގެން ބަދަލުކުރަންޖެހިފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ރެއާލްގެ މިޑްފީލްޑަރު ފެޑަރީކޯ ވަލްވޭޑޭ އެވެ.

މިނަތީޖާއެކު ލީގުގައި ރެއާލް މެޑްރިޑް ކުޅުނު ނުވަ މެޗުން އެޓީމަށް 21 ޕޮއިންޓް ލިބިފައިވާއިރު، ލަނޑުގެ ތަފާތުން އެޓީމު މިވަގުތު އޮތީ ލީގުތާވަލުގެ ދެވަނައިގައެވެ. އަދި މިމެޗުން ބަލިވި ވިލަރެއާލްއަށް ނުވަ މެޗުން 17 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލުގެ ތިންވައިގައެވެ.