ޕާކިސްތާނުގެ ކުރީގެ ބޮޑުވަޒީރު، އމްރާން ޚާން އަށް ތާއީދުކުރާ ފަރާތްތަކުން ކުރިއަށްގެންދާ މުޒާހަރާތަކުގެ ސަބަބުން އެގައުމުގެ ވެރިރަށް، އިސްލާމް އާބާދު ލޮކް ޑައުނަކަށް ގެންގޮސްފިއެވެ.
މިގޮތުން، ޕާކިސްތާނުގެ އޮތޯރިޓީތަކުން ވަނީ އިސްލާމްއާބާދު ބަންދުކުރުމުގެ އިތުރުން، މޮބައިލް ފޯނު ޚިދުމަތްތައް ވެސް މެދުކަނޑާލާފައެވެ.
މި މުޒާހަރާތަކަކީ އިމްރާން ޚާން ދޫކޮށްލުމަށާއި، އެގައުމުގައި މިހާރު ވެރިކަން ކުރަމުންދާ ސަރުކާރަކީ ޣައިރު ޤާނޫނީ ސަރުކާރެއްކަމަށް ބުނެ އިމްރާން ޚާންއަށް ތާއީދުކުރާ ފަރާތްތަކުން ކުރިއަށް ގެންދާ މުޒާހަރާތަކެކެވެ.
ކަމާ ބެހޭ ފަރާތްތަކުން ބުނީ، މި މުޒާހަރާ ހުއްޓުވުމަށްޓަކައި، އިސްލާމާބާދަށް ވަދެނިކުމެވާ މަގުތައް ބަންދުކުރުމަށް ޝިޕިންގ ކޮންޓެއިނަރުތައް ބަހައްޓާފައިވާ ކަމަށާއި، ގިނަ އަދަދެއްގެ ފުލުހުންނާއި ސިފައިން އެ ސަރަހައްދުތަކުގައި ހަރަކާތްތެރިވަމުންދާކަމަށެވެ.
މިމަހުގެ 15 އަދި 16 ގައި އިސްލާމާބާދުގައި ބޭއްވުމަށް ހަމަޖެހިފައިވާ ޝަންގްހާއީ ކޯޕަރޭޝަން އޯގަނައިޒޭޝަން (އެސްސީއޯ) ގެ ބައްދަލުވުމުގެ ތައްޔާރީތަކަށް ހުރަސް އެޅިދާނެތީ، މުޒާހަރާ ފަސްކުރުމަށް އެގައުމުގެ އިންޓީރިއާ މިނިސްޓަރު މުޙްސިން ނަޤްވީ ވަނީ އިމްރާން ޚާނުގެ ޕާޓީއަށް ގޮވާލައްވާފައެވެ. މީގެ އިތުރުންވެސް، ނަޤްވީ ވަނީ އެއްވެސް މީހަކު އިސްލާމާބާދަށް ހަމަލާދޭން ރޭވިޔަސް އެކަން ދޫކޮށްނުލައްވާނެ ކަމަށް ވިދާޅުވެފައެވެ.
ސަރުކާރުގެ މި އެންގުމާއިއެކު ވެސް އިމްރާން ޚާން ވަނީ އެބޭފުޅާ އަށް ތާއީދުކުރާ ފަރާތްތައް އެގައުމުގެ ޕާލިމެންޓް ކުރިމަތީގައި އޮންނަ ސަރަހައްދެއްކަމަށްވާ ޑީ-ޗައުކަށް އަމާން އިހުތިޖާޖު ކުރުމަށް ދިޔުމަށް ގޮވާލައްވާފައެވެ.
މި މުޒާހަރާތަކާއި ގުޅިގެން އިސްލާމާބާދާއި އެ ސިޓީއާއި އިންވެގެންވާރާވަލްޕިންޑީގައި ސްކޫލްތައް ބަންދުކޮށް، މޯބައިލް ފޯނު ޚިދުމަތްތައްވެސް ވަނީ މެދުކަނޑާލާފައެވެ.
Advertisement
This content is created and paid for by advertisers and does not involve Voice Journalists
