ދުނިޔޭގެ އެކި ކަންކޮޅުތަކުގައި ފެތުރެމުންދާ މަކުނުވިދުރި (އެމްޕޮކްސް) އަށް ކުއްލި ހާލަތުގައި ޓެސްޓް ކުރެވޭ ފުރަތަމަ ކިޓް، މާކެޓަށް ނެރުމަށް ދުނިޔޭގެ ސިއްހަތާއި ބެހޭ ޖަމިއްޔާ (ޑަބްލިއުއެޗްއޯ) ހުއްދަދީފިއެވެ.

މިކަމާއި ގުޅިގެން ޑަބްލިއުއެޗްއޯ އިން ނެރުނު ބަޔާނެއްގައި ބުނީ، މި ޓެސްޓް ކިޓް ކުއްލި ހާލަތުގައި ބޭނުންކުރުމަށް ހުއްދަ ދިނުމަކީ އެމްޕޮކްސް ބަލި ފެތުރެމުންދާ ގައުމުތަކުގައި ޓެސްޓުކުރުމުގެ ޤާބިލުކަން އިތުރުކުރުމަށް އެޅޭ ވަރަށް މުހިންމު ފިޔަވަޅެއްކަމަށެވެ.

އެބޮޓް މޮލެކިއުލާއިން. އުފައްދާފައިވާ އެލިނިޓީ އެމް އެމްޕީއެކްސްވީ އެސޭ ކިޔާ މި ޓެސްޓުން އިންސާނުންގެ ހަމުގައި އުފެދޭ ފާރުތަކުން ނަގާ ސާމްޕަލްތަކުން އެމްޕޮކްސް ވައިރަސް ދެނެގަނެވޭނެކަމަށް އެ ޖަމިއްޔާއިން ބުނެއެވެ. މި ކިޓް ބޭނުންކޮށްގެން ކުރާ ޓެސްޓްތަކުގެ ނަތީޖާ ވަގުތުން ލިބޭކަމަށް ޑަބްލިއުއެޗްއޯއިން ބުނެއެވެ.

Advertisement

މިހާތަނަށް އެފްރިކާގެ 16 ގައުމަކުން މި ބަލި ފެނިފައިވާއިރު، އެފްރިކާގައި މި ބަލީގެ ސަބަބުން 800 އަށްވުރެ ގިނަ މީހުން މަރުވެފައިވާކަމަށް އެފްރިކާ ޔޫނިއަންގެ ބަލި ކޮންޓްރޯލް ކުރާ މަރުކަޒުން ބުނެފައިވެއެވެ.

ޑަބްލިއުއެޗްއޯއިން ފާހަގަކުރި ގޮތުގައި، އެފްރިކާގައި މި ބަލި ހަލުއިކަމާއިއެކު ފެތުރެމުންދަނީ ބައްޔަށް ޓެސްޓުކުރުމަށް އެކަށީގެންވާ ވަސީލަތްތައް މަދުވުމުގެ ސަބަބުންނެވެ.

އެފްރިކާގެ އިތުރުންވެސް، ޔޫރަޕާއި އޭޝިއާގެ ބައެއް ގައުމުތަކުންވެސް، މަދުން ނަމަވެސް މި ބަލީގެ ވޭދަނަތައް ފެންނަމުންދާކަން ފާހަގަކޮށްލަން ޖެހެއެވެ.