ޤަވާއިދާ ޚިލާފަށް ރާއްޖެއަށް ގެންނަ ދިރޭ ތަކެތި ނައްތާލުން ނުވަތަ އަނބުރާ ފޮނުވާލުމުގެ ޚަރަދު އެ ތަކެތި ގެންނަ ފަރާތްތަކުން ދޭންޖެހޭ ގޮތް ހަދައިފިއެވެ.
މީގެ ކުރިން ޤަވާއިދުގައި އޮންނަ ގޮތުން ވެރިފަރާތުން ޒިންމާވާން ޖެހެނީ އެހެން ޤައުމަކަށް ފޮނުވާލުމުގެ ޚަރަދަށެވެ.
އެހެންނަމަވެސް، "ނެތި ދިއުމުގެ ބިރު ހީވެފައިވާ ދިރޭ ތަކެތީގެ ބައިނަލްއަޤްވާމީ ވިޔަފާރި ކޮންޓްރޯލް ކުރުމުގެ ޤާނޫނާ ޚިލާފަށް ވިޔަފާރި ކުރެވޭ ތަކެއްޗާއި ގެންގުޅޭ ތަކެތި ނެގުމާއި ނައްތާލުމާ ގުޅޭ" ގަވާއިދަށް ގެނައި ފުރަތަމަ އިސްލާހުގައިވާގޮތުން، އެންމެހާ ޚަރަދުތަކަށް ޒިންމާވާން ޖެހޭނީ އެތަކެތި ގެންނަ ފަރާތުންނެވެ.
މި އިސްލާހު ސަރުކާރުގެ ގެޒެޓްގައި އިއްޔެ ޝާއިއުކޮށްފައިވާއިރު، މި އިސްލާހުގަައިވާގޮތުން، ގަވާއިދާއި ޚިލާފަށް ރާއްޖެއަށް ގެންނަ ދިރޭ ތަކެތި ގެނައި ގައުމަކަށް ނުވަތަ ރެސްކިއު ސެންޓަރަކަށް ނުވަތަ އެކަށީގެންވާ ފެސިލިޓީ އަކަށް ފޮނުވާލުމަށް މެނޭޖްމަންޓް އޮތޯރިޓީން ނިންމައިފިނަމަ، އެކަމަށް ބޭނުންވާ އިންތިޒާމުތައް އެ އެއްޗެއް ގެނައި ފަރާތްތަކުން އެ ދިރޭ އެއްޗެއް ނެގިތާ 7 ދުވަހުގެ ތެރޭގައި ހަމަޖައްސަން ޖެހޭނެއެވެ.
ހަމައެއާއިއެކު، އެ އެއްޗެއް އިންސާނިއްޔަތު ކަމާއި އެކު މަރާލުމަށް މެނޭޖްމަންޓް އޮތޯރިޓީން ނިންމައިފިނަމަ، އެ ތަކެތި އެތެރެކުރި ފަރާތުން އެކަމަށް ހިނގާ ޚަރަދުތަކަށް ވެސް ޒިންމާވާން ޖެހޭނެއެވެ.
މީގެ ކުރިން އަމަލުކުރަމުންދިޔަ އުޞޫލުގެ ދަށުން އެ ހުރިހާ އިންތިޒާމުތަކެއް ހަމަޖެއްސުމަށް ވެރި ފަރާތަށް ދެނީ ދެ ދުވަސްކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
