މިހާރުގެ ސަރުކާރުން ވެރިކަމަށް އައުމަށް ހެދީ ދޮގުތަކެއް ކަމަށާއި، އޭގެ ސަބަބުން ލިބުނު ގެއްލުމުގެ ޒިންމާ ސަރުކާރުގެ ވެރިން އުފުލަންޖެހޭ ކަމަށް އެމްޑީޕީގެ ޗެއަރޕާސަން ފައްޔާޒު އިސްމާޢީލް ވިދާޅުވެއްޖެއެވެ. 

ފައްޔާޒު މިހެން ވިދާޅުވެފައިވަނީ އެކްސް ގައި ކުރެއްވި ޕޯސްޓެއްގައެވެ.

މި ޕޯސްޓްގައި ފައްޔާޒު ފާހަގަކުރައްވާފައިވަނީ، މިހާރުގެ ސަރުކާރުން އިންޑިއާއާއެކު ކުރިއަށްގެންދާ ގުޅުމަކީ އަވަށްޓެރިންނާއެކު ގާތް ގުޅުން ބޭއްވުމުގެ މުހިންމުކަން ސާބިތުކޮށްދޭ ކަމެއް ކަމަށެވެ.

Advertisement

"ހައިޑްރޯގްރަފީ އެއްބަސްވުމާއި ޔޫޓީއެފް، އައްޑޫ އިންފްރާސްޓްރަކްޗަރ މަޝްރޫޢުތައް، އަދި އައްޑޫގައި ކޮންސިއުލޭޓެއް ގާއިމުކުރުމުގެ މަޝްރޫޢު. މިހާރުގެ ސަރުކާރުގެ ލީޑަރުން ސިފަކުރި ގޮތުގައި މިއީ ކޮލޮނައިޒޭޝަން ޕްލޭނެއް. ނަމަވެސް މި މަޝްރޫޢުތަކާއިގެން ކުރިއަށްދިއުމުން ދައްކުވައިދެނީ އިންޑިއާއާއެކު އޮންނަ ގުޅުމަކީ ދިވެހިރާއްޖެއަށް ނުރައްކަލެއް ކަމުގައި ދެއްކުމަކީ ކިހާ ޒިންމާދާރުކަން ކުޑަ ކަމެއްކަން،" ފައްޔާޒު ވިދާޅުވިއެވެ.

އަދި ފައްޔާޒު ވިދާޅުވީ، ރައީސް މުޢިއްޒު އޭރު ދެއްކެވި ދެކޮޅުވެރި ވާހަކަތަކާއި އެންމެ ގާތް ބައިވެރިޔާއާއި ދުރުވުމުގެ ސަބަބުން ވަރަށް ބޮޑު އިޤްތިޞާދީ އަދި ސިޔާސީ ގެއްލުންތަކެއް ވެފައިވާ ކަމަށެވެ.

ހަމަ އެހެންމެ މާލީ ދަތިތަކުން އަރައިގަތުމުގެ ޤާބިލުކަން ގެއްލި، މާލީ ބާޒާރުތަކުގައި ދިވެހިރާއްޖޭގެ އިތުބާރު ގެއްލި، ފައިނޭންސް ހޯދުމުގެ ޤާބިލުކަމަށް އަސަރުކޮށްފައިވާކަމަށް ފައްޔާޒު ފާހަގަކުރެއްވިއެވެ.

”ރައީސް ޑރ. މުޢިއްޒަށް މި ޙަޤީޤަތް ދެނެގަތުމުގެ ވިސްނުން ނެތުމާއި، އެމީހުންގެ ފަރުވާކުޑަ ސިޔާސަތުތަކުގެ ސަބަބުން އަޅުގަނޑުމެންގެ ޤައުމުގެ ބައިނަލްއަޤްވާމީ އަގަށް ބޮޑު ގެއްލުމެއް ލިބި، އޭގެ ނަތީޖާ އާންމު ރައްޔިތުން ވަނީ ތަޙައްމަލުކުރަން ޖެހިފައި،" ފައްޔާޒު ވިދާޅުވިއެވެ.

މިއާއެކު ފައްޔާޒު ވަނީ، ބާރު ހޯދުމަށްޓަކައި ދޮގު ވާހަކަތައް ދައްކައި، އޭގެ ސަބަބުން ލިބުނު ގެއްލުމުގެ ޒިންމާ މިހާރުގެ ސަރުކާރުގެ ވެރިން އުފުލަންޖެހޭނެ ކަމަށް ވެސް ވިދާޅުވެފައެވެ.