އިސްލާމީ މަރުކަޒުގެ މުންނާރުގެ ތިރީގައި ހަދާފައިވާ މަސްފެންގަނޑު ހަލާކުވެ ގިނަ ދުވަސްތަކެއް ވެފައިވާތީ، މި މަސްފެންގަނޑު ސްޓެލްކޯގެ ސީއެސްއާރުގެ ދަށުން މަރާމާތުކޮށްދިނުމަށް އެކުންފުނިން ޝައުޤުވެރިކަން ފާޅުކޮށްފައިވާކަމަށް އިސްލާމީ ކަންތައްތަކާއި ބެހޭ ވުޒާރާއިން ބުނެފިއެވެ.

މީގެ ކުރިން އިސްލާމީ މަރުކަޒަށް 40 އަހަރު ފުރުން ފާހަގަ ކުރުމުގެ ގޮތުން، މުންނާރު ކައިރީގައި މަސްފެންގަނޑެއް ހެދުމަށް އިސްލާމީ ކަންތައްތަކާއި ބެހޭ ވުޒާރާއިން އިއުލާނުކުރި ނަމަވެސް، ރާއްޖޭގެ އިގްތިޞާދީ ހާލަތު އޮތް ގޮތުން، މި ވަގުތު މިފަދަ ކަންކަން ކުރުމަކީ އެންމެ މުނާސަބު ކަމަކަށް ނުވާނެތީ، މި އިއުލާން ބާތިލު ކުރުމަށް ވަޒީރު ޝަހީމް ވަނީ އަންގަވާފައެވެ.

މިކަމާއި ގުޅިގެން މިއަދު އެވުޒާރާއިން ބުނީ، ވަޒީރު ޑރ. މުޙައްމަދު ޝަހީމް އަލީ ސަޢީދާ ސްޓެލްކޯގެ މެނޭޖިން ޑިރެކްޓަރ ހުސައިން ފަހުމީ އަދި ދެ މުއައްސަސާގެ އިސްވެރިން އިއްޔެ ބައްދަލު ކުރައްވާފައިވާ ކަމަށެވެ.

Advertisement

އެ މަޝްވަރާއަށް ފަހު ހުސައިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، އިސްލާމިކް މިނިސްޓްރީއާ ގުޅިގެން އެ މަރުކަޒުގެ ހައިބަތު ފުރިހަމަ ކުރުމަށްޓަކައި މުންނާރުގެ ތިރީގައި އޮންނަ ފެންގަނޑު މަރާމާތު ކުރުމުގެ މަސައްކަތް އެކުންފުނިން ކުރާނެ ކަމަށާއި ކުރިއަށް އޮތް ތަނުގައި ވެސް މިފަދަ މަސައްކަތްތަކަށް ސްޓެލްކޯގެ އެއްބާރުލުން ލިބޭނެ ކަމަށެވެ.

އިސްލާމީ މަރުކަޒަަށް 40 އަހަރު ފުރޭ މުނާސަބަތާއި ގުޅިގެން އިސްލާމީ މަރުކަޒު ސަރަހައްދު ޒީނަތްތެރިކުރުމަށް އެ ވުޒާރާއިން ގިނަ މަސައްކަތްތަކެއް ކުރަމުން އަންނައިރު، އިސްލާމީ މަރުކަޒަށް 40 އަހަރު ފުރުން ކުލަގަދަކޮށް ފާހަގަކުރުމަށް ސަރުކާރުން ނިންމާފައިވާކަން ފާހަގަކޮށްލަން ޖެހެއެވެ.