ރާއްޖޭގެ 23 ރަށެއްގައި މިއަދު މިސްކިތުގައި ހިލޭ ސާބަހަށް ޤާރީ ކިލާސްތައް ހިންގަން ފަށާނެކަމަށް އިސްލާމީ ކަންތައްތަކާއި ބެހޭ ވުޒާރާއިން ބުނެފިއެވެ.

 މުޅި ރާއްޖެއަށް އަމާޒުކޮށްގެން މިސްކިތްތަކުގައި ހިލޭ ސާބަހަށް ޤުރްއާން ކްލާސް ހިންގައިދޭން ބޭނުންވާ އިމާމުންނާއި ޤުރްއާން މުދައްރިސުންނަށް އެކަމަށް އެދި ހުށަހެޅުމުގެ ފުރުސަތު ހުޅުވާލީ މިދިޔަ ޖުލައި މަހުގެ 27 ގައެވެ.

ރާއްޖޭގެ ހުރިހާ ރަށެއްގެ މިސްކިތްތަކުގައި ހިލޭ ސާބަހަށް މިސްކިތު ޤާރީ ކިލާސް ހިންގުމަކީ މިސްކިތްތަކުގެ ދައުރު ފުޅާކުރުމުގެ ގޮތުން، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވައުދުފުޅަކަށް ވާއިރު، އެ ވުޒާރާއިން ބުނީ، މިކަމަށް އެދި ޖުމްލަ 29 ފަރާތަކާއި 3 ޖަމިއްޔާއެއް ކުރިމަތިލާފައިވާކަމަށެވެ.

އޭގެ ތެރެއިން 29 ތަނެއްގައި މި ކްލާސްތައް ހިންގުމަށް ތައްޔާރުވެފައިވާއިރު، މި ހުރިހާ ކްލާސްތަކެއްވެސް ހިންގާނީ ހިލޭ ސާބަހަށްކަން އިސްލާމީ ކަންތައްތަކާއި ބެހޭ ވުޒާރާއިން ފާހަގަކުރެއެވެ. 

މީގެ އިތުރުންވެސް އެ ވުޒާރާއިން ބުނީ، ކުލާސްތައް އޮންނާނީ މިސްކިތްތަކުގައި ކަމަށާއި، މި ކްލާސްތައް މިއަދުން ފެށިގެން ކުރިއަށްދާނެ ކަމަށެވެ.

މި ކްލާސްތަކުގައި ބަލައިގެން ކިޔުމާއި ހިތުދަސްކުރުން ކުރިއަށްދާއިރު، މި ކްލާސްތައް ފުރަތަމަ ފަށާ 23 ރަށަކީ:

- މާލެ ސިޓީ

- ⁠ހުޅުމާލެ

- ⁠ވިލިމާލެ

- ⁠އައްޑޫ ސިޓީ

- ⁠ފުވައްމުލަށް ސިޓީ

- ⁠ހދ. ކުޅުދުއްފުށި

- ⁠އދ މަހިބަދޫ

- ⁠ލ. އިސްދޫ

- ⁠ތ. އޮމަދޫ

- ⁠ނ. ވެލިދޫ

- ⁠ހއ. ކެލާ

- ⁠ގއ. ކޮނޑޭ

- ⁠ށ. ފުނަދޫ

- ⁠ބ. ތުޅާދޫ

- ⁠ގދ. ނަޑެއްލާ

- ⁠ސ. ފޭދޫ

- ⁠ލ. މާވަށް

- ⁠އދ. މާމިގިލި

- ⁠އއ. ތޮއްޑޫ

- ⁠ކ. ތުލުސްދޫ

- ⁠ބ. ކުޑަރިކިލި

- ⁠މ. މުލަށް

- ⁠ތ. ކިނބިދޫ

މިއާއިއެކު، އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް އަލީ ސައީދު ވަނީ ކުދިންނަށް ރަައްކާތެރި މާހައުލެއްގައި ކިޔަވައިދިނުމަށް އިލްތިމާސްކުރައްވާފައެވެ.