ހުޅުމާލޭ ދެވަނަ ފިޔަވަހި، ވިނަރެސް ފްލެޓް ސަރަހައްދުގައި ޖަހަންޖެހޭ މަގުބައްތިތައް ޖެހުމުގެ ގޮތުން ކުރަންޖެހޭ މަސައްކަތްތައް ކުރިއަށްދާކަމަށް އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ފަޒުލް ވިދާޅުވީ، ވިނަރެސް ސަރަހައްދުގައި މަގުބައްތިތައް ޖެހުމުގެ މަސައްކަތް ހުއްތިފައި ނުވާކަމަށެވެ. ފަޒުލް ވިދާޅުވީ މަގުބައްތިތައް ދިއްލުމަށް ބޭނުންވާ ތަކެތި ހޯދުމަށް އޯޑަރު ކުރެވިފައިވާކަމަށެވެ. މަގުބައްތިތައް ދިއްލުމަށް ބޭނުންވާ ކަރަންޓް އެތަނަށް އަޅައި އޮގަސްޓްމަހު އެ މަސައްކަތް ނިމިފަވާކަން ފާހަގަކުރައްވަމުން ފަޒުލް ވިދާޅުވީ، މަގުބައްތިތަކަށް އަޅާފައިވާ ކަރަންޓް ކޭބަލްތައް ވަގަށް ނަގާފައިވާކަމަށެވެ.
ފަޒުލް އިތުރަށް ވިދާޅުވެފައިވަނީ ހުޅުމާލެ ތަރައްޤީކުރުމުގެ މަސައްކަތް ހަމަޖެހިފައިވާ އުސޫލުގެ ތެރެއިން ކުރިއަށްދާކަމަށެވެ. މިގޮތުން ހުޅުމާލޭގައި ރައްޔިތުންގެ ލާބައަށް ކުރަންޖެހޭ ކަންކަން މިހާރުވެސް އެޗްޑީސީގެ މުއައްޒަފުން ވަރުބަލިކަމެއްނެތި ކުރަމުން ގެންދާކަމަށް ފަޒުލް ވިދާޅުވިއެވެ.
އެޗްޑީސީން ދަނީ ހުޅުމާލޭ ދެވަނަ ފިޔަވަހީގައި މިހާރުވެސް މުހިއްމު ގިނަ މަސައްކަތްތަކެއް ކުރަމުންނެވެ. މީގެ ތެރޭގައި ފޭސް ދޭއް ޓަވަރު 12 އާ ދިމާލު އަތިރިމަތީގައި ހެދިކާ ވިއްކުމަށް ހެދި ހަޓްތައް މިހާރު ވަނީ ނިންމައި، އެތަން ހިންގުމަށް ބޭނުންވާ ފަރާތްތަކަށް އެފުރުސަތު ހުޅުވާލާފައެވެ.
މީގެ އިތުރުންވެސް އެޗްޑީސީން ގެންދަނީ ހުޅުމާލެ ފޭސް ދޭއްގައި މިދިޔަ ސަރުކާރުން ފެށުމަށްފަހު ހުއްޓާލާފައިވާ މަޝްރޫޢުތަކުގެ މަސައްކަތްތައް ކުރަމުންނެވެ.
Advertisement
This content is created and paid for by advertisers and does not involve Voice Journalists
