ލާމަސީލުލާމު އަތޮޅު ވޮލީބޯޅަ މުބާރާތުގެ އަންހެން ޑިވިޝަނުގެ ފައިނަލުގައި ވާދަވެރި ކުޅުމަކަށްފަހު ތިން ސެޓް ދެ ސެޓުން އެފްއެސްޑަބްލިޔު ސްޕޯޓްސް ކްލަބް ބަލިކޮށް، ޓީކޭ ސްޕޯޓްސް ކްލަބުން މުބާރާތުގެ ޗެމްޕިއަންކަން ހޯދައިފި އެވެ.

ޓީކޭ މުބާރާތުގެ ފައިނަލުން ޖާގަހޯދީ ސެމީ ގައި ކުނަހަންދޫ އައިލެންޑް ނިއު ޖެނެރޭޝަން (ކިންގް) ބަލިކުރުމަށްފަހު އެވެ. އަދި އެފްއެސްޑަބްލިޔު ފައިނަލުން ޖާގަހޯދީ ސެމީ ފައިނަލުގެ ދެވަނަ މެޗުގައި އައިލެންޑް ޔޫތު ޔުނައިޓެޑް (އައިވައިޔޫ) ބަލިކޮށްފަ އެވެ.

އަންގާރަ ދުވަހު ހަވީރު ކުޅުނު ފޯރިފަދަފައިނަލް މެޗުގެ ފުރަތަމަ ދެ ސެޓް ވާދަވެރި ކުޅުމަކަށްފަހު ކާމިޔާބުކުރީ އެފްއެސްޑަބްލިޔު އިންނެވެ. އެގޮތުން ފުރަތަމަ ސެޓް ދެ ޕޮއިންޓްގެ ފަރަގަކާއެކު 23-25 ގެ ނަތީޖާއަކުން ކާމިޔާބުކުރިއިރު، ދެވަނަ ސެޓް އެޓީމުން ކާމިޔާބުކުރީ ތިން ޕޮއިންޓްގެ ފަރަގަކާއެކު 22-25 ގެ ނަތީޖާއަކުންނެވެ.

Advertisement

ނަމަވެސް މެޗުގެ ތިންވަނަ ސެޓު ފެށިގެން މާ ގިނަ އިރުތަކެއް ނުވަނީސް، ވައި ގަދަވެ ބޯކޮށް ވާރޭ ވެހެން ފެށުމާއެކު ގުޅިގެން މެޗުގެ ކުޅުން ވަނީ މެދުކަނޑާލާފަ އެވެ. އަދި މެޗުގެ ކުޅުން އަލުން ފަށާފައިވަނީ ގާތްގަނޑަކަށް 45 މިނެޓު ފަހުންނެވެ.

ވެހެމުންދިޔަ ބޯ ވާރޭތެރޭގައި މެޗުގެ ބާކީ ބައި ކުޅުނު އިރު، ދެ ޓީމަށްވެސް ވަނީ އޭގެސަބަބުން ދަތިތައް ކުރިމަތިވެފަ އެވެ. ހާއްސަކޮށް، ޑިފެންސް ކުރުމާއި، ސާވިސް ކުރުމުގައި ކުޅުންތެރިންނަށް ވަނީ އުނދަގޫވެފަ އެވެ. 

ޓީކޭ އިން ދެ ސެޓު ކާމިޔާބު ކުރުމާއެކު، މެޗު ވަނީ ފަސް ސެޓަށް ގޮސްފަ އެވެ. އަދި ޓީކޭ އިން ވަނީ ފަސްވަނަ ސެޓު ކާމިޔާބުކޮށް، މުބާރާތުގެ ޗެމްޕިއަންކަން ހޯދާފަ އެވެ.

ފައިނަލް މެޗުގެ މޮޅު ކުޅުންތެރިޔަކަށް ހޮވިފައިވަނީ ޓީކޭގެ އާމިނަތު އަރީޝާ އެވެ. އަދި މީގެ އިތުރުން މުޅި މުބާރާތުގެވެސް އެންމެ މޮޅު ކުޅުންތެރިޔަކަށް ހޮވިފައިވަނީ ވެސް އަރީޝާ އެވެ. އަދި މުބާރާތުގެ އެންމެ މޮޅު ހަ ކުޅުންތެރިންގެ ތެރޭގައި ހިމެނިފައިވަނީ އަރީގެ އިތުރުން، އެ ޓީމުގެ އާމިނަތު ޝަހާ ޝާމިން، ފާތިމަތު ސަމްހާ، އެފްއެސްޑަބްލިޔުގެ އާއިޝަތު މާޖިދާ (މާޖީ)، ފާތިމަތު މަޒިއްޔާ އަދި އައިވައިޔޫގެ ހައްވާ ރާޝިދާ (ހައްވަ) އެވެ.

މުބާރާތުގެ އެންމެ މޮޅު ޒުވާން ކުޅުންތެރިޔަކަށް އައިވައިޔޫގެ އާމިނަތު ރަފާ އިބްރާހިމް ހޮވިފައިވާއިރު، އެންމެ މޮޅު ކޯޗަކީ ޓީކޭގެ އަލީ އަޝްރަފް (އަޝްރާ) އެވެ.