”އުއްމަތް ފަލަސްޠީނާއެކު“ ނަމުގައި ފަލަސްޠީނަށް އެހީވުމަށް ޚާއްސަ ހަރަކާތްތަކެއް މާދަމާބޭއްވުމަށް ހަމަޖެހިއްޖެއެވެ. 

މި ހަރަކާތަކީ ”ޔޫތް ފޯ ޔުނިޓީ“ (ވައިފޯޔޫ) ޖަމިއްޔާގެ ޒުވާނުންއިސްނަގައިގެން، ރައިޓް މޫވމަންޓް، ބްލަޑް ޑޯނާސް، ކޭކު ޑޯނާސް، ޝީލަޑް ހުޅުމާލޭ ސްޕޯޓްސް ކްލަބު އަދި ދުވާފަރު އިސްލާމިކް މޫވްމަންޓްއާ ގުޅިގެން ކުރިއަށް ގެންދާ އިވެންޓެކެވެ.

އެ ޖަމިއްޔާއިން ”ވޮއިސް“ އަށް މައުލޫމާތު ދެއްވަމުން ބުނީ، މި ހަރަކާތުގެ މަޤްޞަދަކީ ދުނިޔޭގެ އެހެނިހެން ޤައުމުތަކުގަ ހިންގޭ ހަރަކާތްތައް ފަދައިން، ދިވެހީންގެ ހިތްތައް ފަލަސްޠީނާއެކު ދެމިއޮންނާނެކަމާއި، ދިވެހިންގެ އެއްބައިވަންތަކަން ނުގުޑާކަން ދެއްކުން ކަމަށެވެ.

Advertisement

”ވަކި ޤައުމަކަށް ބެލުމެއްނެތި އުއްމަތުގެ ދިފާޢުގައި މުސްލިމުންގެ އެއްބައިވަންތަކަން ދައްކުވައިދޭ މި ޙަރަކާތަކީ، އަޚުންނާއި އުޚުތުންގެ ޤުރުބާނީގެ ހަނދާންތައް އާކޮށްދޭ ހަރަކާތެއް. އަދި ފަލަސްތީނަށް ވެވެން އޮތް ހުރިހާ ގޮތަކުން ވެސް އެއްބާރުލުން ދޭން ތައްޔާރަށް ތިބި ކަން ކަށަވަރު ކުރުން“ ވައިފޯޔޫ ޖަމިއްޔާއިން ބުނެފައިވެއެވެ. 

އެގޮތުން، ”އުންމަތް ފަލަސްޠީނާއެކު“ އިވެންޓްގެ ތެރެއިން މައިގަނޑު ތިން ހަރަކާތެއް ކުރިއަށް ގެންދިޔުމަށް ވަނީ ހަމަޖެހިފައެވެ. 

1. އާއިލީ ހަވީރު: މި އާއިލީ ހަވީރު ބޭއްވުމަށް ހަމަޖެހުފައިވަނީ މާދަމާ 4:15 އިން 6:00 އަށް ކަމަށް ބުނެފައިވެއެވެ.

2. ބޮޑު ހިނގާލުން: ބޮޑު ހިނގާލުން ބޭއްވުމަށް ހަމަޖެހިފައިވަނީ ހުކުރު ދުވަހުގެރޭ 8:00 ގައެވެ. ހިނގާލުން، ސޯޝަލް ސެންޓަރުން ފަށާއިރު ނިންމާ ގޮތަށް ހަމަޖެހިފައުވަނީ އާޓިފިޝަލް ބީޗުންނެވެ. 

3. ބޮޑު އެއްވުން: ހިނގާލުން ނިންމާލުމަށްފަހު އާޓިފިޝަލް ބީޗު ސަރަހައްދުގައި މާދަމާރޭ 9:00 ވާއިރު ބޮޑު އެއްވުމެއް ބޭއްވުމަށް ހަމަޖެހުފައިވާ ކަމަށްވެސް ވައިފޯޔޫ އިން ބުނެއެވެ.

އެ ޖަމިއްޔާއިން އިތުރަށް ބުނެފައިވާ ގޮތުން، އާއިލީ ހަވީރާއި ބޮޑު އެއްވުމުގައި ފަންޑު ފޮށި ބެހެއްޓުމަށް ވަނީ ހަމަޖެހުފައެވެ. އަދި ހަރަކާތްތަކުން ލިބޭ ފައިސާ ފަލަސްތީނަށް ހަދިޔާ ކުރުމަށް ވަނީ ނިންމާފައެވެ.