އަންނަ ހަފްތާގެ ހޯމަ ދުވަހާއި ހަމައަށް ރާއްޖޭގެ ހުރިހާ ސަރަހައްދަކަށްވެސް އާއްމުވައި ގަދަކޮށް ހިފަހައްޓާނެކަމަށާއ، އާއްމުކޮށް އުދަ އަރާ ސަރަހައްދުތަކަށް ދިޔަވަރު ބޮޑުވާ ގަޑިތަކުގައި އުދައިގެ އަސަރުކުރުން އެކަށީގެންވާކަމަށް މޫސުމާއި ބެހޭ އިދާރާ (މެޓް އޮފީސް) އިން ބުނެފިއެވެ.

މެޓް އޮފީހުން ބުނީ، ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވެ، ރާއްޖެ އާއި ދުރުން އުތުރާއި ދެކުނުގައި ދެކޮޅިގަނޑު އުފެދިފައިވާކަމަށެވެ. އެއާއިއެކު، ވޭތުވެދިޔަ ހަތަރު ދުވަހު އުތުރާއި މެދުރާއްޖެ ތެރޭގެ ސަރަހައްދަށް އާއްމުވައި ގަދަވެ، ވިލާގަނޑުގައި ވައި ވަރަށް ގަދަވެފައިވާކަމަށެވެ.

މިގޮތުން، ވިލާގަނޑުގައި އެންމެ ވައިގަދަވި ކަމަށް ރެކޯޑް ކުރެވިފައިވަނީ ބ.ދަރަވަންދޫގައި އޮކްޓޫބަރު މަހުގެ 9 ވަނަ ދުވަހު 23:10 ގައި ގަޑިއަކު 53 މޭލު ބާރުމިނުގައި، އަދި ހުޅުމާލެއަށް މިއަދު 05:40 ގައި ގަޑިއަކު 58 މޭލަށް އަދި 10:46 ގައި 61 މޭލު ބާރުމިނުގައި ކަމަށް މެޓް އޮފީހުން ބުނެއެވެ.

Advertisement

މީގެ އިތުރުންވެސް، މެޓް އޮފީހުން ހާމަކުރި ގޮތުގައި، މި މުއްދަތުގައި އެންމެ ބޯކޮށް ވާރޭވެހިފައިވާކަމަށް ރެކޯޑްކުރެވިފައިވަނީ އޮކްޓޫބަރު 8 ވަނަ ދުވަހު ޏ.ފުވައްމުލަކަށް 120 މިލިމީޓަރެވެ.

އަންނަ ހަފްތާގެ ހޯމަ ދުވަހާއި ހަމައަށް ރާއްޖޭގެ ހުރިހާ ސަރަހައްދަކަށްވެސް އާއްމުވައި ގަދަކޮށް ހިފަހައްޓާނެކަމަށް މެޓް އޮފީހުން ލަފާކޮށްފައިވާއިރު، އެ އިދާރާއިން ބުނީ، އުތުރާއި މެދުރާއްޖެ ތެރޭގެ އަތޮޅުތަކުގައި އެވަރެޖްކޮށް ގަޑިއަކު 15 މޭލާއި 25 މޭލާއި ދެމެދު ވައިޖެހި، ބޮޑުބަޔަކަށް ގަދަވަޔާއިއެކު ވިއްސާރަކޮށް ގުގުރާނެކަމަށް ލަފާ ކުރާކަމަށެވެ.

ހަމައެއާއިއެކު، ދެކުނުގެ އަތޮޅުތަކަށް އެވަރެޖްކޮށް ގަޑިއަކު 10 މޭލާއި 20 މޭލުގެ ބާރުމިނުގައި ވައިޖެހޭނެކަމަށް މެޓް އޮފީހުން ލަފާކުރާއިރު، ބައެއް ހިސާބުތަކަށް ގަދަވަޔާއިއެކު ވިއްސާރަކޮށް ގުގުރާނެކަމަށް ވެސް އެ އޮފީހުން ބުނެއެވެ.

ވިލާގަނޑުގައި ހުރިހާ ހިސާބުތަކަށް ވެސް ގަޑިއަކު 45 މޭލާއި 55 މޭލަށް ވައިގަދަވުން އެކަށީގެންވާކަމަށާއި، ރާއްޖޭގެ ބޮޑު ބަޔަކަށް ގަދަވަޔާއިއެކު ވިއްސާރަކޮށް ގުގުރާނެކަމަށާއި،  އާއްމުކޮށް އުދަ އަރާ ސަރަހައްދުތަކަށް ދިޔަވަރު ބޮޑުވާ ގަޑިތަކުގައި އުދައިގެ އަސަރުކުރުން އެކަށީގެންވާކަމަށްވެސް މެޓް އޮފީހުން ލަފާކުރެއެވެ.

އެހެންކަމުން، މެޓް އޮފީހުން ވަނީ ހުރިހާ ފަރާތްތަކުން މޫސުމަށް ސަމާލުވުމަށް، ހާއްސަކޮށް ކަނޑުދަތުރުފަތުރު ކުރާ ފަރާތްތަކުން، ދަތުރަށް ފެށުމުގެ ކުރިން މޫސުމާއި ބެހޭ އެންމެ ފަހުގެ މައުލޫމާތު ހޯދުމަށް އިލްތިމާސްކޮށްފައެވެ.