އިލެކްޝަން ކޮމިޝަނުގެ ފަަރާތުން ސިޔާސީ ޕާޓީގެ ޤާނޫނަށް ގެންނަން ފެންނަ އިޞްލާޙުތައް އެޓަރނީ ޖެނެރަލްގެ އޮފީހަށް މިއަދު ފޮނުވައިފިއެވެ.

މިކަމާ ގުޅޭގޮތުން އިލެކްޝަނުން ބުނެފައިވަނީ، ސިޔާސީޕާޓީތަކުގެ ޤާނޫނަށް ގެންނަން ފެންނަ އިސްލާހުތަށް އޭޖީ އޮފީހަށް ހުށަހަޅާފައިވާނީ، މީގެ ކުރިން އެކި ފަހަރުމަތިން ސިޔާސީޕާޓީތަކާއެކު ބޭއްވި ބައްދަލުވުންތަކުގައި އެކަންކަމަށް މަޝްވަރާކުރުމަށް ފަހުކަމަށެވެ.

މިގޮތުން މި އިޞްލާޙުތަކަކީ 2019 ވަނަ އަހަރުން ފެށިގެން ސިޔާސީ ޕާޓީތަކާއެކު ފުޅާ ދާއިރާއެއްގައި މަޝްވަރާކުރެވި، ސިޔާސީ ޕާޓީތަކުން އެއްބަސްވެފައިވާ އިޞްލާޙުތަކެއްކަމަށްވެސް އިލެކްޝަނުން ފާހަގަކުރިއެވެ. 

އިޞްލާޙުތަކާބެހޭ ގޮތުން މަޝްވަރާ ކުރުމަށް ހުރިހާ ސިޔާސީ ޕާޓީތަކަށް ދަޢުވަތުދީގެން މިއަހަރުގެ އޮކޓޯބަރުމަހުގެ 8 ވަނަ ދުވަހު އިތުރު ބައްދަލުވުމެއް އިލެކްޝަނުން ވަނީ ބައްވާފައެވެ. މި ބައްދަލުވުމުގައި، ދިވެހި ރައްޔިތުންގެ ޑިމޮކްރެޓިކް ޕާޓީ، ޖުމްހޫރީ ޕާޓީ، މޯލްޑިވްސް ޑިވެލޮޕްމަންޓް އެލަޔަންސް އަދި މޯލްޑިވްސް ނޭޝަނަލް ޕާޓީ، އަދި ކޮމިޝަނުގެ ފަސް މެމްބަރުންނާއި ސެކްރެޓަރީ ޖެނެރަލްގެ އިތުރުން ގުޅުންހުރި ސެކްޝަންތަކުގެ ވެރިން ބައިވެރިވިއެވެ.

މި ބައްދަލުވުމުގައި ސިޔާސީ ޕާޓީގެ ޤާނޫނަށް ގެންނަ އިޞްލާޙުތަކަށް އިތުރަށް މަޝްވަރާކޮށް ހުށަހެޅުންތައް ވަނީ ހުށަހަޅާފައެވެ.

ސިޔާސީޕާޓީތަކުގެ ޤާނޫނަށް ގެނަައުމަށް ނިންމާފައިވާ އިސްލާހްތަކުގެ ތެރޭގައި ޕާޓީތަކަށް މިހާރު ފައިސާ ދޭ އުސޫލަށް ގެންނަ އިސްލާހްް ފާހަގަކޮށްލެވެއެވެ. މިގޮތުން މިހާރު ސިޔާސީޕާޓީއަށް ފައިސާ ލިބެނީ އެ ޕާޓިއެއްގެ ދަފްތަރުގައި 10،000 މީހުން ހަމަވާނަމައެވެ. ނަމަވެސް އަލަށް ގެންނަ އިސްލާހާއެކު، 3،000 މެމްބަރުން ހަމަވާ ޕާޓީތަކަށްވެސް މާލީ ގޮތުން އިނާޔަތް ލިބިގެންދާނެއެވެ. މީގެ އިތުރުން އިންތިހާބުތަކުގައި ހޯދާ ކާމިޔާބީއަށް ރިޔާއަތްކޮށްވެސް މާލީ އިނާޔާތް ލިބިގެންދާނެއެވެ.

ސިޔާސީ ޕާޓީގެ ޤާނޫނަށް ގެންނަން މި ހުށަހަޅާ އިޞްލާޙުތަކުގެ ސަބަބުން، ސިޔާސީ ޕާޓީތަކުގެ ދަފްތަރު ޒަމާނީ ޑިޖިޓަލް ނިޒާމަކަށް ބަދަލުކުރުމުގެ ފުރުޞަތު ފަހިވެ، ސިޔާސީ ޕާޓީތަކުގެ ހިންގުން ހަރުދަނާވެ، އިތުރު ފަސޭހަތަކެއް ލިބިގެން ދާނެއެވެ.