ދުނިޔޭގައި އުފެދުނު އެންމެ މޮޅު އެއް ޓެނިސް ކުޅުންތެރިޔާ ސްޕެއިންގެ ރަފައެލް ނަޑާލް، ކުރިއަށް އޮތް ޑޭވިސް ކަޕަށް ފަހު ޕްރޮފެޝަނަލް ކެރިއަރު ނިންމާލާނެކަން އިއުލާނުކޮށްފި އެވެ.

އުމުރުން 38 އަހަރުގެ ނަޑާލްގެ ޕްރޮފެޝަނަލް ކެރިއަރުގައި ކުޅޭ ފަހު މުބާރާތަކަށް ވެގެންދާނީ ނޮވެމްބަރު މަހު ސްޕެއިނުގެ މަލާގާގައި އޮންނަ ޑޭވިސް ކަޕް ފައިނަލްސް އެވެ.

މިދިޔަ ދެ އަހަރެއްހާ ދުވަހު، އަނިޔާގެ އެކި މައްސަލަތަކާ ހުރެ ނަޑާލް އަށް ކުޅެވުނީ މަދު މުބާރާތްތަކެއްގަ އެވެ. ޓެނިހުގެ ގްރޭންޑް ސްލޭމް 22 ތަށި ހޯދާފައިވާ ނަޑާލް، މިދިޔަ އަހަރު މިޑިއާއަށް ދިން އިންޓަވިއުއެއްގައި ވަނީ މި އަހަރަކީ އޭނާގެ ޕްރޮފެޝަނަލް ކެރިއަރުގެ ފަހު ސީޒަން ކަމަށް ބުނެފަ އެވެ.

މިއަދު އާންމުކުރި ވީޑިއޯއެއްގައި ނަޑާލް ބުނެފައިވަނީ، މިއީ، އޭނާ ރިޓަޔަކުރަން އެންމެ ރަނގަޅު ވަގުތު ކަމަށް ގަބޫލުކުރާ ކަމަށެވެ.

"ހަގީގަތުގައި މިދިޔަ ދެ އަހަރު މިދިޔައީ ވަރަށް އުނދަގޫކޮށް. އަހަންނަށް ޔަގީންވަނީ އުނދަގުލެއް ނެތި އަހަރެން ކުޅުނު އެއްވެސް މުބާރާތެއް ނޯންނާނެހެން،" ނޮވަކް ޖޮކޮވިޗަށް ވުރެ ފަހަތުގައި މި ވަގުތު އޮތް ޓެނިހުގެ ތާރީހުގައި ދެ ވަނަ އަށް އެންމެ ކާމިޔާބު ކުޅުންތެރިޔާ، ނަޑާލް ބުންޏެވެ.

ނަޑާލްގެ ކާމިޔާބީ ޓެނިސް ކެރިއަރުގައި އޭނާ ވަނީ 14 ފަހަރު ފްރެންޗް އޯޕަން ކާމިޔާބުކުރުމުގެ އިތުރުން ޔޫއެސް އޯޕަން ތަށި ހަތަރު ފަހަރު، ވިމްބަލްޑަން އާއި އޮސްޓްރޭލިއަން އޯޕަން މިއިން ކޮންމެ މުބާރާތެއް ދެ ފަހަރު ކާމިޔާބުކޮށްފައިވެ އެވެ. އަދި ނަޑާލް ވަނީ އޮލިމްޕިކްސްގެ ސިންގަލްސް އާއި ޑަބަލްސް އިން ރަން މެޑަލް ހޯދުމުގެ އިތުރުން، ސްޕެއިނަށް ފަސް ޑޭވިސް ކަޕް ހޯދައިދޭން އެހީތެރިވެދީފަ އެވެ. އެންމެ ފަހުން، އެ ތަށި ހޯދީ 2019 ވަނަ އަހަރު އެވެ.

މީގެ އިތުރުން ދުނިޔޭގެ އެންމެ ބޮޑު ފުޓްބޯޅަ ކްލަބް، ރެއާލް މެޑްރިޑްގެ އެމްބަސަޑަރެއްގެ ގޮތުގައި ވެސް މަސައްކަތް ކުރާ ނަޑާލް ޓެނިހުގައި މަޝްހޫރުވެފައިވާ އެއް ނަމަކީ، "ކިންގް އޮފް ކްލޭ" އެވެ. އެއީ، ފްރެންޗް އޯޕަން މުބާރާތުގައި ކުޅުނު 116 މެޗުގެ ތެރެއިން 112 މެޗުން މޮޅުވެފައިވާތީ އެވެ.