ރާއްޖޭގައި ގަވާއިދާއި ޚިލާފަށް އުޅެމުންދާ ބިދޭސީން ހޯދުމަށް ކުރިއަށް ގެންދާ މަސައްކަތުގެ ތެރެއިން، އަނެއްކާވެސް ބިދޭސީންތަކެއް އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން ބުނީ، ހުޅުމާލޭގެ 10 ތަނެއް ބަލައި ފާސްކޮށް، 9 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެވިފައިވާކަމަށެވެ.

އިމިގްރޭޝަނުން މިކަމާއި ގުޅޭ ވީޑިއޯއެއްވެސް އާއްމުކޮށްފައިވާއިރު، އިމިގްރޭޝަންގެ އޮފިސަރުން ބޯކޮށާ ތަންތަނާއި އެނޫންވެސް އެފަދަ ތަންތަން ބަލާފާސްކުރާތަން ވީޑިއޯއިން ފެނިގެން ދެއެވެ.

އިމިގްރޭޝަނުން އާންމުކޮށްފައިވާ ތަފާސް ހިސާބުތައް ދައްކާ ގޮތުން މިދިޔަ އަހަރުގެ ނޮވެމްބަރު މަހުގެ 17 ވަނަ ދުވަހުން ފެށިގެން ފާއިތުވި 10 މަަސްދުވަހުގެ ތެރޭގައި 4،054 ބިދޭސީން ވަނީ ޑީޕޯޓްކޮށްލާފައެވެ.

ބިދޭސީންގެ މައްސަލަ ޙައްލުކުރުމަކީ ސަރުކާރުން ޚާއްސަ އިސްކަމެއް ދީގެން ކުރިއަށްގެންދާ މަސައްކަތެއްގެ ގޮތުގައި އިމިގްރޭޝަނުން ވަނީ ހާމަކޮށްފައެވެ.

މިގޮތުން، އިމިގްރޭޝަނުން މާލޭގައި ޚާއްސަ އޮޕަރޭޝަންތަކެއް ހިންގަމުންދާއިރު، ރާއްޖޭގެ އެހެން ރަށްރަށާއި ރިސޯޓުތަކުގައިވެސް ބިދޭސީންގެ މަޢުލޫމާތު އެއްކުރަމުންދެއެވެ. މީގެއިތުރުން، ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މަޢުލޫމާތުވެސް އެއްކުރެވެމުންދާކަމަށް އެ އިދާރާއިން ބުނެއެވެ.