ބޭސް ސިޓީއަށް ސަލާން ޖެހުމުގެ ސަގާފަތް ރާއްޖޭގައި އަނެއްކާވެސް ފެށިފައިވާކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

ޝާހިދު މިފަދައިން ވިދާޅުވީ، އެމްޑީޕީގެ "ލާމަރުކަޒީ ގުޅުން" ކޮންފަރެންސް ހދ. ކުޅުދުއްފުށީގައި ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ޝާހިދު ވިދާޅުވީ، މި ސަރުކާރަށް ވެރިކަން ލިބިއްޖެނަމަ، އާސަންދައިން ހިލޭ ބޭސްފަރުވާކުރުން ސަލާން ޖެހުމަށް ބަދަލުވާނެކަމަށް އެމްޑީޕީން ބުނި ކަމަށެވެ. 

Advertisement

އިންޑިއާގެ ވަރަށްގިނަ ހޮސްޕިޓަލްތަކުން އާސަންގެ ހިދުމަތް ކަނޑާލާފައިވާކަމަށާއި، ދުބާއީ އާއި ބެންކޮކަށް އާސަންދައިން ފުރައިގެންދާ މީހެއްގެ ހަބަރު މަދުން ނޫނީ ނީވޭކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ، ރާއްޖޭގައި އޮތީ ދެ ފިކުރު ކަމަށެވެ.

މީގެ ތެރެއިން، މިނިވަން ކަމާއި ލާމަރުކަޒީ ފިކުރާއި އެކުވެރިކުރުމާއި އެއްބައިވަން ކުރުމުގެ ފިކުރަކީ އެމްޑީޕީގެ ފިކުރު ކަމަށާއި، އެޕާޓީން ގެންގުޅެނީ ތެދުވެރިކަމާ އެކު މަސައްކަތްކޮށް ކާމިޔާބުގެ ހަރުފަތްތައް ހާސިލް ކުރުމުގެ ފިކުރުކަމަށް ޝާހިދު ވިދާޅުވިއެވެ.

ޝާހިދު އިތުރަށް ވިދާޅުވީ، މިއަދު ކަން ދިމާވިގޮތުން ރާއްޖޭގެ ވެރިކަމަށް އައިސްފައި އޮތީ އަނިޔާވެރިކަމާއި އޮޅުވާލުމާއި މަކަރާއި ނަފްރަތާއި ކަންކަން ނެތިކޮށްލުމުގެ ފިކުރު ކަމަށެވެ.