ބޭސް ސިޓީއަށް ސަލާން ޖެހުމުގެ ސަގާފަތް ރާއްޖޭގައި އަނެއްކާވެސް ފެށިފައިވާކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ، އެމްޑީޕީގެ "ލާމަރުކަޒީ ގުޅުން" ކޮންފަރެންސް ހދ. ކުޅުދުއްފުށީގައި ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ޝާހިދު ވިދާޅުވީ، މި ސަރުކާރަށް ވެރިކަން ލިބިއްޖެނަމަ، އާސަންދައިން ހިލޭ ބޭސްފަރުވާކުރުން ސަލާން ޖެހުމަށް ބަދަލުވާނެކަމަށް އެމްޑީޕީން ބުނި ކަމަށެވެ.
އިންޑިއާގެ ވަރަށްގިނަ ހޮސްޕިޓަލްތަކުން އާސަންގެ ހިދުމަތް ކަނޑާލާފައިވާކަމަށާއި، ދުބާއީ އާއި ބެންކޮކަށް އާސަންދައިން ފުރައިގެންދާ މީހެއްގެ ހަބަރު މަދުން ނޫނީ ނީވޭކަމަށް ޝާހިދު ވިދާޅުވިއެވެ.
"އަޅުގަނޑުމެން ދަންނަވަމުން ގެންދިޔައިން ރައްޔިތުންގެ އަރިހުގައި މި އަނިޔާވެރި ފިކުރަށް ޖާގަ ލިބިއްޖެނަމަ އާސަންދައިން ހިލޭ ބޭސްފަރުވާކުރުން ބަދަލުވެގެންދާނެއޭ ސަލާން ޖެހުމަށް، ބޭސް ސިޓީއަށް ސަލާޖެހުމުގެ ސަގާފަތް އަނެއްކާ ފެށިގެން ރާއްޖޭގައި މިދަނީ، އެބޭފުޅުން ވިދާޅުވި އިންޑިޔާއަކުން ނޫނޭ ދެން ތިމަންނަމެން އާސަންދައިގެ ހިދުމަތްދޭނީ، ދުބާއީއަށް، ބެންކޮކުންނޭ، ތެދުފުޅެއް އިންޑިއާގެ ވަރަށްގިނަ ހޮސްޕިޓަލްތަކުގެ އާސަންގެ ހިދުމަތް މިހާރު ކަނޑާލައިފި، ދުބާއީއަށް ބެންކޮކަށް އާސަންދައިން ފުރައިގެންދާ މީހެއްގެ ހަބަރު މަދުން ނޫނީ ނީވޭ،"
ޝާހިދު ވިދާޅުވިއެވެ.
ޝާހިދު ވިދާޅުވީ، ރާއްޖޭގައި އޮތީ ދެ ފިކުރު ކަމަށެވެ.
މީގެ ތެރެއިން، މިނިވަން ކަމާއި ލާމަރުކަޒީ ފިކުރާއި އެކުވެރިކުރުމާއި އެއްބައިވަން ކުރުމުގެ ފިކުރަކީ އެމްޑީޕީގެ ފިކުރު ކަމަށާއި، އެޕާޓީން ގެންގުޅެނީ ތެދުވެރިކަމާ އެކު މަސައްކަތްކޮށް ކާމިޔާބުގެ ހަރުފަތްތައް ހާސިލް ކުރުމުގެ ފިކުރުކަމަށް ޝާހިދު ވިދާޅުވިއެވެ.
"ވާދަވެރި ފިކުރަކަށް މިއޮތީ މިއަދު މިއޮތް ސަރުކާރު ނިސްބަތްވާ ފިކުރު، ދޮގާއި އޮޅުވާލުމާއި މަކަރާއި ނަފްރަތު އުފެއްދުމާއި، އަޅުވެތި ކުރުމާއި، ބާރުތައް ޖަމާކޮށް އޭގެ މައްޗަށް ވެރިވެ ގަތުގެ ފިކުރާއި އަނިޔާވެރި ކަމުގެ ފިކުރު،"
ޝާހިދު ވިދާޅުވިއެވެ.
ޝާހިދު އިތުރަށް ވިދާޅުވީ، މިއަދު ކަން ދިމާވިގޮތުން ރާއްޖޭގެ ވެރިކަމަށް އައިސްފައި އޮތީ އަނިޔާވެރިކަމާއި އޮޅުވާލުމާއި މަކަރާއި ނަފްރަތާއި ކަންކަން ނެތިކޮށްލުމުގެ ފިކުރު ކަމަށެވެ.
Advertisement
This content is created and paid for by advertisers and does not involve Voice Journalists
