ހުޅުމާލެ ދެވަނަ ފިޔަވަހިން ބީލަމުގެ އުސޫލުން 18 ބިމެއް ވިއްކުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހުޅުވާލައިފިއެވެ.

އެޗްޑީސީން ކުރި އިއުލާނެއްގައި، ބީޗް ފްރަންޓުން ދެ ބިމަކާއި، ބީޗް ސައިޑް 16 ބިމެއް ވިއްކުމަށް ވަނީ ހުޅުވާލާފައެވެ. މި ބިންތަކަކީ 1،864 އަކަފޫޓާއި 2،408 އަކަފޫޓުގެ ބިންތަކެކެވެ.

މި ބިންތައް ގަންނަން ބޭނުންވާ ފަރާތްތަކަށް އެޗްޑީސީގެ ބިޑް ޕޯޓަލް މެދުވެރިކޮށް އެޕްލިކޭޝަން ހުށަހެޅޭނެ ކަމަށާއި، 18 އަހަރު ފުރިފައިވާ ދިވެހި އަމިއްލަ ފަރުދުންގެ އިތުރުން 100 އިންސައްތަ ދިވެހިންގެ ހިއްސާ އޮންނަ ކުންފުނިތަކަށް ވެސް ބީލަމުގައި ބައިވެރިވުމުގެ ފުރުސަތު ހުޅުވާލާފައިވާ ކަމަށް އެ ކޯޕަރޭޝަނުން ބުނެއެވެ.

Advertisement

މީގެ އިތުރުންވެސް، އެ ކޯޕަރޭޝަނުން ބުނީ، ބީލަން ފެށޭ އަގަކީ ބީޗް ފްރަންޓްގެ ބިންތަކަށް އަކަފޫޓަކަށް 4،500 ރުފިޔާ ކަމަށާއި، އަދި ބީޗް ސައިޑްގެ ބިންތަކަށް އަކަފޫޓަކަށް 4،000 ރުފިޔާ ކަމަށެވެ.

ހުޅުމާލެ ފޭސް ދޭއް އިން ސިނާއީ ބޭނުމަށް ބީލަމުގެ އުސޫލުން ބިން ގަތުމުގެ ފުރުސަތު ވެސް އެ ކޯޕަރޭޝަނުން ދާދިފަހުން ހުޅުވާލިކަން ފާހަގަކޮށްލަން ޖެހެއެވެ.