ވިފާގް މަރުގެ މައްސަލައާ ގުޅޭގޮތުން ރިޕޯޓްކޮށްފައިވަނީ، ބައެއް ކަންކަމުގެ އަސްލު އޮޅުވާލައިގެންކަމަށް ފުލުހުން މިއަދު ބުނެފިއެވެ.

މިދިޔަ އޮގަސްޓްމަހުގެ 14 ވަނަ ދުވަހު މަރުވި ވިފާގު އިބްރާހިމް އަދުނާނުގެ މަރުގެ މައްްސަލައާ ގުޅޭގޮތުން މީޑިއާއަކުން ގެނެސްދިން ރިޕޯޓާ ގުޅިގެން، ފުލުހުން ބޭއްވި ނޫސްވެރިންގެ ބައްދަލުވުމެއްގައި ފުލުހުން ވަނީ އެ ރިޕޯޓްގައި ކަންބޮޑުވާ ކަންތައްތަކެއް ހުރިކަން ފާހަގަކޮށްފައެވެ.

އެ ރިޕޯޓާ ގުޅޭގޮތުން ވާހަކަދައްކަވަމުން ހެޑް އޮފް މޭޖާ ކްރައިމް އިންވެސްޓިގޭޝަންސް، ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ، ރިޕޯޓްގައި ބައެއް ކަންކަން ގެނެސްދީފައިވަނީ ބައެއް ކަންކަމުގެ އަސްލު އޮޅުވާލާފައިކަމަށެވެ. ރިޕޯޓްގައި ވަނީ ވިފާގް މަރުގެ މައްސަލާގައި އޭނާގެ އާއިލާއަށް ބޮޑެތި ތުހުމަތުތަކެއް ކޮށްފައެވެ. އަދި ރިޕޯޓްގައި ވަނީ މައްސަލަ ތަހުގީގުކުރަމުންދާ ފުލުހުންނަށްވެސް ކަންތައްތަކެއް ތުހުމަތުކޮށްފައެވެ.

ޝިފާއު ވިދާޅުވީ، ރިޕޯޓްގައި ފުލުހުން ކަންބޮޑުވާ ކަންތައްތަކެއް ހުރިކަމަށެވެ. އެގޮތުން ރިޕޯޓްގައި ގެނެސްދީފައިވާ ޒާތީ މައުލޫމާތުތަކުގައި ހަގީގަތާ ހިލާފް ވާހަކަތައް ހިމެނޭކަމަށާއި، އަދި ޖިންސީ ގޯނާކަމަށް ތުހުމަތުކުރި ނަމަވެސް އެފަދަ އެއްވެސް ކަމެއް އޭނާގެ ހަށިގަނޑުން ފާހަގަކުރެވިފައި ނުވާކަމަށެވެ.

ވިފާގަކީ ނަފްސާނީ ބައްޔަށް ފަރުވާ ހޯދަމުން އައި މީހެއްކަން ފާހަގަކުރަމުން ފުލުހުން ބުނީ، ރިޕޯޓްގައި ފުލުހުންގެ ވާހަކަ ގެނެސްފައިވާއިރު، އެކަމާ ގުޅިގެން ފުލުހުންގެ ފަރާތުން ބަހެއް ހޯދާފައި ނުވާކަމަށެވެ. އެ މައްސަލައިގެ ވާހަކަ ރިޕޯޓްކުރިއިރު، ރައްޔިތުން ކަންބޮޑުވާ ކަންތައްތަކެއް ހުރިކަން ފާހަގަކުރަމުން ޝިފާއު ވަނީ، ރިޕޯޓްގެ މައްސަލަ ބްރޯޑްކާސްޓިން ކޮމިޝަނަށް ހުށަހަޅާފައިވާކަމަށް ވިދާޅުވެފައެވެ. ވިފާގް މަރުގެ މައްސަލައަކީ މިހާރުވެސް ފުލުހުން ތަހުގީގް ކުރަމުން އަންނަ މައްސަލައެއްކަމަށްވެސް އޭނާ ވިދާޅުވިއެވެ.

މިދިޔަ އޮގަސްޓްމަހުގެ 14 ވަނަ ދުވަހު ވިފާގް މަރުވެފައިވަނީ އޭނާ ދިރިއުޅެމުން އައި ހ. ހަސޯވާގެ 10 ވަނަ ފަންގިފިލާއިން ވެއްޓިގެންނެވެ. މި މައްސަލާގައި އެއްވެސް މީހެއްގެ މައްޗަށް އަދި ތުހުމަތު ކުރެވިފަ ނުވާކަމަށް ފުލުހުން ބުނެއެވެ.