އަންނަ އަހަރުން ފެށިގެން ބައެއް ޓެކްސްތައް ނަގަމުން އަންނަ ރޭޓް ބޮޑުކުރުމަށް މަޖިލީހަށް ބިލެއް ހުށަހަޅައިފިއެވެ.

ރޭޓް އިތުރުކުރުމަށް ހުށަހެޅި ޓެކްސްތަކުގެ ތެރޭގައި ޓީޖީއެސްޓީ އާއި، ގްރީން ޓެކްސް އަދި އެއާޕޯޓް ޑިވެލޮޕްމަންޓް ޓެކްސް  ހިމެނެއެވެ.

ސަރުކާރުގެ ފަރާތުން މާފަންނު ހުޅަނގު ދާއިރާގެ މެންބަރު މުހައްމަދު މުސްތަފާ ހުށަހަޅާފައިވާ މި ބިލްގައި ވާގޮތުން މިހާރު 16 އިންސައްތައިގެ ރޭޓްގައި ނަގަމުން އަންނަ ޓީޖީއެސްޓީ ޓެކްސް ރޭޓް ވަނީ، އަންނަ އަހަރުގެ ޖޫންމަހުން ފެށިގެން 17 އިންސައްތައަށް އިތުރުކުރުމަށް ހުށަހަޅާފައެވެ. މީގެ އިތުރުން ގްރީން ޓެކްސް ވަނީ 50 އިންސައްތަ އިތުރުކުރުމަށް ނިންމާފައެވެ. 

ބިލް ހުށަހެޅި ފަރާތުން ބުނެފައިވަނީ ޓީޖީއެސްޓީ ޓެކްސް ރޭޓް އިތުރުކުރުމުން 2025 ވަނަ އަހަރު ފަތުރުވެރިކަމުގެ ދާއިރާއިން 201.9 މިލިއަން ރުފިޔާ ލިބޭނޭ ކަމަށް ލަފާކުރެވޭ ކަމަށެވެ. 

މި ބިލް މާދަމާގެ ޖަލްސާއަށް އެޖެންޑާކޮށްފައިވާއިރު، ޓެކްސް ރޭޓް އިތުރުކުރުމަށް ނިންމި މަގްސަދުތަކުގެ ތެރޭގައި ދައުލަތުގެ ފިސްކަލް އަދި ދަރަނި ދެމެހެއްޓެނިވިކަން އިއާދަކުރުމާއި، ދައުލަތަށް ބޭރުފައިސާއިން ލިބޭ އާމްދަނީ އިތުރުކުރުން ހިމެނެއެވެ.