ރައީސް ޑރ. މުހައްމަދު މުއިއްޒުގެ ކެބިނެޓްގެ ވަޒީރުންނަށް ގެނެވުނު ބަދަލާއެކު، ވުޒާރާތަކުގެ އައު ވަޒީރުންނަށް ރުހުން ހޯދުމުގެ މައްސަލަ ރައްޔިތުންގެ މަޖިލީހަށް ހުށަހަޅައިފި އެވެ.

ތިން ވަޒީރުންނަށް ރުހުން ހޯދުމުގެ މައްސަލަ މިއަދުގެ ޖަލްސާގައި މަޖިލީހަށް ހުށަހަޅާފައިވާއިރު އެ މައްސަލަ ދިރާސާ ކުރުމަށް ސަރުކާރު މަސްއޫލިޔަތު އަދާކުރާ މިންވަރުބަލާ ކޮމިޓީއަށް ވަނީ ފޮނުވާފަ އެވެ.

ސެޕްޓެމްބަރު 30 ވަނަ ދުވަހު، ރައީސް މުޢިއްޒު ވަނީ ތިން ވުޒާރާައެއްގެ ވަޒީރުން ބަދަލު ކުރައްވާފައެވެ. އެގޮތުން ބަދަލު ގެންނަވާފައިވަނީ ފިނޭންސް މިނިސްޓްރީ، ފޮރިން މިނިސްޓްރީ އަދި ހެލްތް މިނިސްޓްރީއަށެވެ.

Advertisement

މިނިސްޓަރ އޮފް ފޮރިން އެފެއާޒްގެ މަޤާމަށް ބަދަލު ކުރެއްވީ ހެލްތު މިނިސްޓަރ ކަމުގައި ހުންނެވި ޑރ. އަބްދުالله ޚަލީލެވެ. މިނިސްޓާ އޮފް ފިނޭންސްގެ މަޤާމުގައި ހުންނެވި ޑރ. ޝަފީގު މަގާމުން އިސްތިއުފާ ދެއްވުމުން އެމަގާމަށް އޭރު ފޮރިން މިނިސްޓަރ ކަމުގައި ހުންނެވި މޫސާ ޒަމީރު އައްޔަނު ކިރެވުނު އިރު، މިނިސްޓާ އޮފް ހެލްތްގެ މަޤާމަށް އައްޔަނު ކުރެއްވީ ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޓެންޑް އޮން ޕަބްލިކް ޕޮލިސީގެ މަގާމުގަ ހުންނެވި އަބުދުالله ނާޒިމް އިބްރާހީމެވެ.

ޤާނޫނުއަސާސީގައި ބުނެފައިވަނީ ވަޒީރުންގެ މަޖިލީހަށް ރައީސުލްޖުމްހޫރިއްޔާ އައްޔަނުކުރާ މީހުންގެ ނަންތައް އެމީހުން އައްޔަނު ކުރެވޭ ދުވަހުން ފެށިގެން ހަތް ދުވަހުގެ ތެރޭގައި ރައްޔިތުންގެ މަޖިލީހުގެ ރުހުން ހޯދުމަށްޓަކައި އެމަޖިލީހަށް ހުށަހަޅަންވާނެ ކަމަށެވެ.