ލުބުނާނުގެ ހިޒްބުﷲ ޖަމާއަތުން އިސްރާއީލުގެ އުތުރުގައި ހުރި ޔަހޫދީ ފައުޖުގެ ބޭސް އަކަށް ދިން ޑްރޯން ހަމަލާއެއްގައި، 4 ސިފައިން މަރާލައި 58 ސިފައިން ޒަހަމްކޮށްލައިފިއެވެ.

މީގެ ތެރެއިން 7 މީހުންނަށް ވަރަށް ބޮޑެތި ޒަހަމްތައް ލިބިފައިވާއިރު، އިސްރާއީލުގެ އެންބިއުލާންސް ސާވިސް، މަގެން ޑޭވިޑް އެޑޮމް (އެމްޑީއޭ) އިން ބުނީ، ޖުމްލަ 61 މީހަކަށް އެކި ވަރުގެ ޒަހަމްތައް ލިބިފައިވާއިރު، އޭގެ ތެރެއިން 3 މީހުންގެ ހާލު ސީރިއަސް ކަމަށެވެ.

ހިޒްބުﷲ އިން މި ހަމަލާއާއި ގުޅޭ ގޮތުން ވިދާޅުވީ، މިއީ ހައްދުފަހަނައަޅާފައިވާ އިސްރާއީލުން، ލުބުނާނުގެ ދެކުނަށާއި، ވެރިރަށް ބެއިރުތަށް އަށް އަމާޒުކޮށް ދިން ހަމަލާތަކުގެ ރައްދެއްކަމަށެވެ.

Advertisement

ހިޒްބުﷲ އިން ހާމަކުރެއްވި ގޮތުގައި، އެ ޖަމާއަތުން ވަނީ ޔަހޫދީ ފައުޖުގެ ކޭމްޕަށް އަމާޒުކޮށް ޑްރޯންގެ ގިނަ ހަމަލާތަކެއް ފޮނުވާލާފައެވެ.

އިސްރާއީލުގެ މީޑިއާތަކުން ރިޕޯޓްކުރާ ގޮތުގައި، ހިޒްބުﷲ އިން ފޮނުވާލި މި ހަމަލާއާއި ގުޅިގެން އެކަން އެންގުމަށް އެގައުމުގެ އެލާމް ސިސްޓަމްތައް ވަނީ ފެއިލްވެފައެވެ.