އދ ގެ އާއްމު މަޖިލީހުގައި ބައްދަލުވުމުގައި ވަޑައިގަތުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެމެރިކާގެ ނިއުޔޯކަށް ކުރެއްވި ދަތުރުފުޅަށް ހަރަދުވީ، 2.4 މިލިއަން ރުފިޔާކަމަށް ރައީސް އޮފީހުން ހާމަކޮށްފިއެވެ.

ރައީސް ޑރ.މުއިއްޒު އދ ގެ އާއްމު މަޖިލީހުގައި ބައްދަލުވުމުގައި ބައިވެރިވެ ވަޑައިގަތުމަށް ދަތުރުފުޅު ކުރެއްވީ މިދިޔަ ސެޕްޓެމްބަރުމަހުގެ 20 ވަނަ ދުވަހުން ފެށިގެން 29 ވަނަ ދުވަހުގެ ނިޔަލަށެވެ. ރައީސް އޮފީހުން ބުނީ، މ ދަތުރުފުޅުގައި މީގެ ކުރިން އެއްވެސް ވެރިޔަކު އދ ގެ އާއްމު މަޖިލީހުގައި ތަގުރީރުކުރެއްވުމަށް ކުރައްވާ ދަތުރުފުޅުގައި ހަރަކާތްތެރިވެ ނޫޅުއްވާ މިންވަރަށް ރާއްޖެއަށް ފަހިވާނެ ހަރަކާތްތަކުގައި ރައީސް ޑރ.މުއިއްޒު ހަރަކާތްތެރިވެ ވަޑައިގެންފައިވާކަމަށެވެ.

މިގޮތުން ރައީސްގެ މި ދަތުރުފުޅާ ގުޅިގެން މީޑިއާގެ ސަމާލުކަން ވަރަށްބޮޑަށް ލިބުނުކަން ފާހަގަކުރައްވަމުން ރައީސް އޮފީހުން ބުނީ އދ ގެ ސެކިއުރެޓީ ކައުންސިލުގައި ރާއްޖޭގެ ރައީސަކު ފުރަތަމަ ފަހަރަށް ތަގުރީރުކުރެއްވީ މި ދަތުރުގެ ތެރެއިން ރައީސް ޑރ.މުއިއްޒު ކަމަށެވެ.

Advertisement

އދ ގެ އާއްމު މަޖިލީހުގެ 79 ވަނަ ސެޝަނުގެ "ހައިލެވެލް ވީކް" ގައި ބައިވެރިވެ ވަޑައިގަތުމަށް ނިއުޔޯކަށް ކުރެއްވި މި ދަތުރުފުޅުގެ ހަރަދުބަރަދުގެ ތަފްސީލް ހާމަކުރަމުން ރައީސް އޮފީހުން ވަނީ، ރައީސް ސޯލިހުގެ ދައުރުގައި ކުރެއްވި ދަތުރުފުޅުތަކުގެ ހަރަދުތައްވެސް އާއްމުކޮށްފައެވެ.

މިގޮތުން ރައީސް ސޯލިހުގެ ވެރިކަމުގައި އދ ގެ އެންމެ އިސްވެރިންގެ ބައްދަލުވުމުގައި ބައިވެރިވެ ވަޑައިގަތުމަށް ދެ ފަހަރަކު ނިއުޔޯކަށް ރައީސުލްޖުމްހޫރިއްޔާ ވަޑައިގެންނެވިއިރު، 2019 ވަނަ އަހަރު 4.1 މިލިއަން ރުފިޔާ އަދި 2021 ވަނަ އަހަރު 5.3 މިލިއަން ރުފިޔާ ދައުލަތުން ހަރަދުކުރެއްވިކަމަށް ރައީސް އޮފީހުން ބުންޏެވެ.