ވޭޕް އޮއިލްގެ ނަމުގައި އެތެރެކުރަން އުޅުނު މަސްތުވާތަކެތި ހިމެނޭ ޝިޕްމެންޓްތަކެއް ކަސްޓަމްސް އިން ހުއްޓުވައިފިއެވެ.

ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު އަލީ އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ، "ވޭޕް އޮއިލް" ގެ ނަމުގައި ރާއްޖެއަށް އެތެރެކުރަން އުޅުނު މަސްތުވާތަކެތީގެ ބާވަތެއްކަމަށްވާ ކެނަބިސް އަޅާފައިވާ ޝިޕްމެންޓްތަކެއް ކަސްޓަމްސް އިން ހިފަހައްޓާފައިވާކަމަށެވެ.

މިއީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ވޭޕް ރާއްޖެއަށް އެތެރެކުރުން މަނާކުރެއްވުމަށް ނިންމެވި އެންމެ ބޮޑު އެއް ސަބަބުކަމަށް ވަޒީރު އިހުސާން ވިދާޅުވިއެވެ.

Advertisement

މީގެ އިތުރުންވެސް، ވަޒީރު ކުރެއްވި އެހެން ޕޯސްޓެއްގައި ވިދާޅުވީ، މިއަހަރުގެ މެއި މަހުގެ 14 ވަނަ ދުވަހު ރާއްޖެ އެތެރެކުރަން އުޅުނު ކެނަބިސް އަޅާފައިވާ ވޭޕް ކާޓްރިޖްތަކެއް ހިފެހެއްޓުނުކަން ހާމަކޮށްފައެވެ.

ވަޒީރު ވިދާޅުވީ، ސްކޫލްތަކުގައި ކިޔަވާ ކުދިންނަށް މިފަދަ މަސްތުވާތަކެތި ހިމެނޭ ވޭޕް އޮޅުވާލައިގެން ދެމުންދާކަން ފާހަގަކުރެވިފައިވާކަމަށެވެ.

ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ އިން ފެށިގެން މަނާ ކުރުމަށާއި، ޑިސެމްބަރު މަހުގެ 15 ވަނަ ދުވަހުން ފެށިގެން ރާއްޖޭގައި ވޭޕްގެ ވިޔަފާރިކުރުމާއި އެ ބޭނުންކުރުން މަނާކުރަން ނިންމަވާފައިވާކަން ރައީސް ޑރ.މުޢިއްޒު ވަނީ އިއްޔެ ހާމަކުރައްވާފައެވެ.