ރަޝިއާ އާއި ޔޫކްރެއިން އާއި ދެމެދު ހިނގަމުންދާ ހަނގުރާމާއިގައި، އުތުރު ކޮރެއާއިން ރަޝިއާއަށް އެހީވުމަށް ސިފައިން ފޮނުވިކަމަށް ޔޫކްރެއިންގެ ރައީސް ވޮލޮޑިމީރް ޒެލެންސްކީ ތުހުމަތު ކޮށްފިއެވެ.
ރަޝިއާ އާއި އުތުރު ކޮރެއާ އާއި ދެމެދު އޮތް ގުޅުމާއި މެދު ކަންބޮޑުވުން ފާޅުކުރައްވަމުން، ޒެލެންސްކީ އާއްމު ކުރި ވީޑިއޯ މެސެޖެއްގައި ވިދާޅުވީ، އެދެގައުމުގެ މެދުގައި މިހާރު ބަދަލުކުރަމުންދަނީ ހަމައެކަނި ހަތިޔާރު ނޫންކަމަށާއި، ސިފައިންވެސް މި ހަނގުރާމައަށް ފޮނުވަމުންދާކަމަށެވެ.
މިއާއިއެކު، ޒެލެންސްކީ ވަނީ ޔޫކްރެއިނަށް އިތުރު ހަތިޔާރު ފޯރުކޮށްދިނުމަށް އެގައުމަށް އެހީތެރިވާ ގައުމުތަކަށް ގޮވާލައްވާފައެވެ.
ޒެލެންސްކީ މިފަދައިން ތުހުމަތު ކުރައްވާފައިމިވަނީ ރަޝިއާ އާއި އުތުރު ކޮރެއާ އާއި ދެމެދު އޮތް ގުޅުން ވަރަށް ބޮޑަށް ބަދަހި ވެފައިވާ ދަނޑިވަޅެއްގައެވެ. މިގޮތުން ދެ ގަރުނަށްފަހު، ދާދި ފަހުން ރަޝިއާގެ ރައީސް ވްލަޑްމީރް ޕުޓިން އުތުރު ކޮރެއާ އަށް ވަޑައިގެންފައިވާކަން ފާހަގަކޮށްލަން ޖެހެއެވެ.
ޒެލެންސްކީގެ މި ތުހުމަތުތައް ރަޝިއާއިން ދޮގު ކުރިނަމަވެސް ދެކުނު ކޮރެއާއިން ވަނީ، މި ކަމާއި ގުޅޭ ކަންކަން މިދިޔަ ހަފްތާއިން ފެށިގެން އެގައުމުން ބަލަމުން އަންނަކަމަށާއި، ޒެލެންސްކީގެ ތުހުމަތުތަކަކީ ހަގީގަތެއްކަމަށް ވަރަށް ބޮޑަށް ބެލެވޭކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists
