ސިނގިރޭޓަށްވުރެ ވޭޕް ރައްކާތެރިކަމަށް ދެކެވޭ ވާހަކަތަކަކީ ހަގީގަތެއް ނޫންކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން މިފަދައިން ބުނީ އެކްސްގައި ކުރި ޕޯސްޓެއްގައެވެ.

މިގޮތުން، އެޗްޕީއޭއިން ބުނީ، ދުންފަތުގެ ބާވަތްތަކުގެ ތެރޭގައި ވޭޕްވެސް ހިމެނޭކަމަށާއި، ޝީޝާ، ދުންފަތް، ހީޓެޑް ޓޮބޭކޯ، އަދި އީ-ސިނގިރޭޓްގައި ވެސް ހިމެނޭ ނިކޮޓީންއަކީ ދުންފަތުގެ ބާވަތްތަކުގައި ހިމެނޭ ދެވިހިފާ އެއްޗެހި ކަމަށެވެ.

Advertisement

އެޗްޕީއޭގެ ޕޯސްޓްގައި، އެ އެޖެންސީން ވަނީ މި ބާވަތްތައް ބޭނުންކުރުމުން ނިކޮޓިންގެ އިތުރުން ނުރައްކާތެރި އެހެނިހެން ކެމިކަލްތަކަށް ހުށަހެޅި ކެންސަރުފަދަ ބަލިތައް ޖެހޭކަން ފާހަގަކޮށްފައެވެ.

އެޗްޕީއޭއިން މިފަދައިން ބުނިއިރު، ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށާއި، ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން 15 ޑިސެމްބަރ 2024 އިން ފެށިގެން މަނާކުރުމަށް ނިންމަވާފައިވާކަން ރައީސް ޑރ.މުޢިއްޒު ހާމަކުރެއްވީ އިއްޔެއެވެ.

މިއާއިއެކު ރައީސް ޑރ.މުޢިއްޒު ވަނީ މިކަމަށްޓަކައި ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގަވާފައިވާކަމަށް ވެސް ވިދާޅުވެފައެވެ.

ވޭޕް ރާއްޖޭގައި މަނާކުރުމަށް ރައީސް ޑރ.މުޢިއްޒު ނިންމެވިއިރު، އެމަނިކުފާނު ވަނީ ދުންފަތުގެ އިސްތިޢުމާލު ކުރުމުން ދުރުހެލިވުމަށް ބާރު އެޅުމުގެ ގޮތުން، ސިގިރޭޓާއި ބިޑިން ނަގާ އިމްޕޯޓް ޑިއުޓީގެ ސްޕެސިފިކް ރޭޓާއި އެޑްވަލޮރެމް ރޭޓް 1 ނޮވެމްބަރ 2024 އިން ފެށިގެން ބޮޑުކުރުމަށް ޤާނޫނަށް އިސްލާޙު ގެނައުމަށް މި ހަފްތާގައި މަޖިލީހަށް ފޮނުވުމަށް ނިންމަވާފައިވާކަންވެސް މިއަދު ހާމަކުރައްވާފައެވެ.