ސަރުކާރުގެ ފަރާތުން ޓެކްސް ރޭޓަށް ބަދަލު ގެންނަން ނިންމިގޮތް ބަލައިނުގަނެވޭނޭކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.

އެމްޑީޕީން ގެނެސްދޭ ހަވަރުބެރު، ޕްރޮގްރާމްގައި ވާހަކަދައްކަވަމުން، ސަރުކާރުގެ ފަރާތުން ޓޫރިޒަމް ދާއިރާގެ ބައެއް ޓެކްސްތަކާއި، އެނޫންވެސް ބައެއް ފީތައް ބޮޑުކުރަން މަޖިލީހަށް ހުށަހެޅި މައްސަލާގައި ފައްޔާޒް ވިދާޅުވީ، ސަރުކާރުން ޓެކްސްތަކަށް ބަދަލުގެނައުމަށް ނިންމާފައިވަނީ، އިގްތިސާދީ އަދި ޓޫރިޒަމް ދާއިރާގެ ހާލަތަށް އެއްވެސް ވަރަކަށް ބެލުމެއް ނެތި ކަމަށެވެ.

އެމްޑީޕީގެ ވެރިކަމުގައި އެންމެފަހުން ޓެކްސްތައް މުރާޖައާކޮށް ޓީޖީއެސްަޓީ ފަދަ ޓެކްސްތައް ބޮޑުކުރީ ވަރަށްބޮޑަށް ވިސްނާފައި ކަމަށާއި، އެގޮތުން އޭރު ބައިނަލްއަޤްވާމީ މާލީ އިދާރާތަކުންވެސް ރާއްޖޭގެ އިގްތިސާދު އޮތްގޮތުން އެކަމަށް އިރުޝާދު ދީފައިވާކަމަށް ފައްޔާޒް ވިދާޅުވިއެވެ. އަދި އެމްޑީޕީން ޓެކްސްތައް ބޮޑުކުރީ، ޓެކްސް ރޭޓަށް ބަދަލު ނުގެންނަތާ ގިނަ އަހަރުތަކަކަށް ފަހުގައި ކަމަށްވެސް ފައްޔާޒު ވިދާޅުވިއެވެ.

Advertisement

ފައްޔާޒް ވިދާޅުވީ ސަރުކާރުން ޓެކްސް ރޭޓް ބޮޑުކުރުމަށް ނިންމާފައިވަނީ ރާއްޖެ އަންނަ ފަތުރުވެރިއާއަށްވެސް އެކަމުގެ ބުރަ ބޮޑުވާގޮތަށް ކަމަށެވެ. އެއާޕޯޓް ފީތައް ބޮޑުކޮށް އަދި ޓެކްސް ރޭޓް ބޮޑުކުރުމުން ރާއްޖެ އަންނަ ފަތުރުވެރިންގެ މިސްރާބް އެހެން ދިމާލަކަށް ދިއުމުގެ ފުރުސަތު ވަރަށް ބޮޑުކަމަށް ފައްޔާޒު ވިދާޅުވިއެވެ.

ފައްޔާޒް ވިދާޅުވީ ފަތުރުވެރިން މިހާރު ރާއްޖެ އަންނަނީ ވަރަށް ކުޑަ އަގުތަކެއްގައި ކަމަށާއި، ސަރުކާރަށް ޓެކްސް ދެއްކިނަމަވެސް ހުންނަ ތަނަށް ކުރަންޖެހޭ ހަރަދު ކުރިއާ ހިލާފަށް މިހާރު އަގުހެޔޮ ކަމަށެވެ. ރިސޯޓްތަކުން މިހާރު ފަތުރުވެރިން ރާއްޖެ ގެންނަނީ ވަރަށްބޮޑަށް އަގުތައް ދަށްކުރުމަށްފަހު ކަމަށާއި، ކުރިން ރިސޯޓްތަކަށް ބޮޑެތި އަގުތައް ލިބުނު ނަމަވެސް މިހާރު އެ އަގުތައް ނުލިބޭ ކަމަށެވެ. ޓެކްސް ރޭޓްތައް ބޮޑުކުރުމުން އެ އަގުތަކަށް ތަންތަން ނުވިއްކޭނޭކަމަށްވެސް ފައްޔާޒް ވިދާޅުވިއެވެ.

ފައްޔާޒް ވިދާޅުވީ ޓެކްސް ރޭޓަށް މިހާރު ގެންނަން އުޅޭ ބަދަލަށް އަމަލުކުރަން ފަށައިފިނަމަ، އޭގެ ނަތީޖާ ވަރަށް ގޯސްވާނެ ކަމަށާއި، މިއީ ކުއްލިއަކަށް ނިންމަންޖެހޭ އުސޫލުން ނިންމަންޖެހޭ ފަދަ ކަންތައްތައް ނޫންކަމަށެވެ

ސަރުކާރުން ވަނީ އަންނަ އަހަރުން ފެށިގެން ބައެއް ޓެކްސްތައް ނަގަމުން އަންނަ ރޭޓް ބޮޑުކުރުމަށް މަޖިލީހަށް ބިލެއް ހުށަހަޅާފައެވެ. ރޭޓް އިތުރުކުރުމަށް ހުށަހެޅި ޓެކްސްތަކުގެ ތެރޭގައި ޓީޖީއެސްޓީ އާއި، ގްރީން ޓެކްސް އަދި އެއާޕޯޓް ޑިވެލޮޕްމަންޓް ޓެކްސް ފާހަގަކޮށްލެވެއެވެ.

ސަރުކާރުގެ ފަރާތުން މާފަންނު ހުޅަނގު ދާއިރާގެ މެންބަރު މުހައްމަދު މުސްތަފާ ހުށަހަޅާފައިވާ މި ބިލްގައި ވާގޮތުން މިހާރު 16 އިންސައްތައިގެ ރޭޓްގައި ނަގަމުން އަންނަ ޓީޖީއެސްޓީ ޓެކްސް ރޭޓް ވަނީ، އަންނަ އަހަރުގެ ޖޫންމަހުން ފެށިގެން 17 އިންސައްތައަށް އިތުރުކުރުމަށް ހުށަހަޅާފައެވެ. މީގެ އިތުރުން ގްރީން ޓެކްސް ވަނީ 50 އިންސައްތަ އިތުރުކުރުމަށް ނިންމާފައެވެ. 

ބިލް ހުށަހެޅި ފަރާތުން ބުނެފައިވަނީ ޓީޖީއެސްޓީ ޓެކްސް ރޭޓް އިތުރުކުރުމުން 2025 ވަނަ އަހަރު ފަތުރުވެރިކަމުގެ ދާއިރާއިން 201.9 މިލިއަން ރުފިޔާ ލިބޭނޭ ކަމަށް ލަފާކުރެވޭ ކަމަށެވެ.