އިންޑިއާގެ ކަނޑުގެ ސިފައިންގެ ލަޝްކަރަށް 2 ނިއުކްލިއަރ ސަބްމެރިން އިތުރުކޮށް، އެމެރިކާގައި އުފައްދާ ދުރު ރާސްތާ 31 އަސްކަރީ ޑްރޯން ގަތުމަށް އިންޑިއާއިން ނިންމައިފިއެވެ.

ޗައިނާއާއި އަސްކަރީ ވާދަވެރިކަން އިތުރުވެފައިވާ މިދަނޑިވަޅުގައި އިންޑިއާގެ އަސްކަރީ ގާބިލްކަން އިތުރުކުރުމަށް މި ނިންމުން ނިންމާފައިވަނީ އިންޑިއާގެ ކެބިނެޓްގެ ސަލާމަތީ ކަންކަމާ ބެހޭ ކޮމިޓީއިންނެވެ. މި ކޮމިޓީގެ ރިޔާސަތު ބަލަހައްޓަވަނީ ބޮޑުވަޒީރު ނަރެންދްރަ މޯދީއެވެ.

ޒަމާނީ ހަތިޔާރާއި، ކުރީއްސުރެވެސް ބޭނުންކުރާ ހަތިޔާރު އުފުލުމުގެ ގާބިލްކަން ލިބިގެންވާ 2 ސަބްމެރިންގެ ހުރިހާ މަސައްކަތެއް ކުރާނީވެސް އިންޑިއާގައެވެ. ނިއުކްލިއަރ ހަކަތައިން ދުއްވާނެ މި ސަބްމެރިންތަކަކީ އިންޑިއާގައި އުފައްދާ މިފަދަ ފުރަތަމަ ސަބްމެރިންތަކެވެ. އާއްމުކޮށް ބޭނުންކުރާ ޑީސަލް އަދި އިލެކްޓްރިކް ސަބްމެރިންތަކަށްވުރެ ނިއުކްލިއަރ ސަބްމެރިންތަކުގެ ދުވެލި ހަލުވިވެފައި، ކަނޑުއަޑީގައި ޒަމާންތަކެއް ވަންދެން އޮޕަރޭޓްކުރުމުގެ ގާބިލްކަންވެސް މި ސަބްމެރިންއަށް ލިބިގެންވެއެވެ.

އޮސްޓްރޭލިއާ، އެމެރިކާ އަދި އިނގިރޭސިވިލާތުން ގުޅިގެން އުފައްދާފައިވާ އޯކަސް ޕާޓްނަރޝިޕް މެދުވެރިކޮށް އެގައުމުތަކުންވެސް ދަނީ ފަހުގެ ޓެކްނޮލޮޖީގެ ސަބްމެރިންތައް އުފެއްދުމަށް މަސައްކަތްކުރަމުންނެވެ. މިހާތަނަށް ނިއުކްލިއަރ ހަކަތައިން ދުއްވާ ސަބްމެރިން އުފައްދާ އޮޕަރޭޓްކުރަނީ ހަމައެކަނި އެމެރިކާ، އިނގިރޭސިވިލާތް، ފަރަންސޭސީ ވިލާތް އަދި ޗައިނާ އާއި ރަޝިޔާއިންނެވެ. މިއީ އދގެ ސަލާމަތީ މަޖިލީހުގެ ދާއިމީ މެމްބަރުކަން ކުރާ 5 ގައުމުވެސް މެއެވެ.

އިންޑިއާއިން ގެންދަނީ އިންޑިއާ ކަނޑުގެ ސަރަހައްދުގައި އެގައުމުގެ އަސްކަރީ ބާރު ގަދަކުރުމަށް މަސައްކަތްތައް ކުރަމުންނެވެ. އިންޑިއާއަކީ ޗައިނާގެ ނުފޫޒާއި ދެކޮޅަށް އުފައްދާފައިވާ އެމެރިކާ، ޖަޕާން، އޮސްޓްރޭލިއާ ހިމެނޭ ކުއަޑްގެ މެމްބަރެކެވެ.