މޯލްޑިވްސް ރިފޯމް މޫވްމަންޓް (އެމް.އާރު.އެމް) އުވާލުމުގެ މަސައްކަތް ކުރަމުންދާކަމަށް އިލެކްޝަން ކޮމިޝަނުން މިއަދު ބުނެފިއެވެ.
އިލެކްޝަންސް ކޮމިޝަނުން ބުނީ، ސިޔާސީ ޕާޓީގެ ޤާނޫނުގައި ގޮތުގެމަތީން މޯލްޑިވްސް ރިފޯމް މޫވްމަންޓް (އެމް.އާރު.އެމް) އުވާލުމުގެ މަސައްކަތް މި ކޮމިޝަނުން ކުރަމުންދާކަމަށެވެ.
މިގޮތުން އެމްއާރުއެމުން އަދާކުރަންޖެހޭ ދަރަންޏެއްވާނަމަ، އަންނަ ނޮވެމްބަރުމަހުގެ 10 ވަނަ ދުވަހުގެ ނިޔަލަށް، އެ ޕާޓީގެ އޮފީހަށް އެކަން ހުށަހަޅުއްވައި ނިންމެވުމަށް އިލެކްޝަނުން ވަނީ އިލްތިމާސްކޮށްފައެވެ. އިލެކްޝަނުން އެމްއާރުއެމް އުވާލުމަށް ނިންމީ އެޕާޓީގައި މެމްބަރުން ހަމަނުވުމުގެ ސަބަބުންނެވެ. މެމްބަރުން ހަމަކުރަން ދިން މުއްދަތުގައި އެ ޕާޓީއަށް މެމްބަރުން ހަމަކުރެވިފައެއް ނުވެއެވެ.
ސިޔާސީޕާޓީތަކުގެ ޤާނޫނުގައި ލާޒިމްކޮށްފައިވަނީ، މަދުވެގެން 3،000 މެމްބަރުން ތިބެންޖެހޭނެ ކަމަށެވެ.
އިލެކްޝަނުން ވަނީ މީގެ ކުރިންވެސް މެމްބަރުން ހަމަނުވާތީ، އެމްއާރުއެމް އުވާލުމުގެ މަސައްކަތް ކުރިއަށްގެންގޮސްފައެވެ. އެމްއާރުއެމްއަކީ ކުރީގެ ރައިސް މައުމޫން، ޕްރޮގްރެސިވް ޕާޓީ އޮފް މޯލްޑިވްސް، ޕިޕީއެމް ގެއްލުމުން އޭގެ ބަދަލުގައި އުފެއްދި ޕާޓީއެކެވެ.
Advertisement
This content is created and paid for by advertisers and does not involve Voice Journalists
