އެމްއެންޑީއެފުން ކުރިއަށް ގެންދިޔަ "އޮޕަރޭޝަން ހިރާސް ފާސް 2024" ނިންމާލައިފިއެވެ.

މިއީ، ކެމިކަލް ރައްކާކުރުމުގައި ބަޔާންކުރާ ޤަވާޢިދުތަކަށް އާންމު ރައްޔިތުން ހޭލުންތެރިކުރުވުމަށް، އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ކުރިއަށް ގެންދިޔަ އޮޕަރޭޝަނެކެވެ.

އެމްއެންޑީއެފުން ބުނީ، މި އޮޕަރޭޝަން ނިންމުމުގެ ގޮތުން އިއްޔެ ކަޅުތުއްކަލާކޮށީގައި ބޭއްވި ޑީބްރީފިންގގައި މިނިސްޓަރ އޮފް ޑިފެންސްގެ ނައިބު، ފާޠިމަތު މިޒުނާ ޢަލީއާއި، އެފްއާރުއެސްގެ ކޮމަޑާންޓް، ބްރިގޭޑިއަރ ޖެނެރަލް ޢަބްދުﷲ ޒުޙުރީ ބައިވެރިވެލެއްވިކަމަށެވެ.

Advertisement

އޮކްޓޫބަރު 1 އިން 15 އަށް ކުރިއަށްގެންދިޔަ މި އޮޕަރޭޝަންގައި އެމްއެންޑީއެފުން ވަނީ ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ޤަވާއިދާ އެއްގޮތަށްތޯ ބެލުމުގެ އިތުރުން، ގްރޭޓަރ މާލެ އޭރިއާގައި ފަސޭހައިން އަލިފާންރޯވާ ފަދަ ތަންތަނާއި އެ ތަންތަނުގައި ހުރި ހިރާސްތައް ވެސް މި އޮޕަރޭޝަންގެ ތެރެއިން ދެނެގަނެފައެވެ.

އަދި މި އޮޕަރޭޝަންގައި މާލެ ސިޓީ، ހުޅުމާލެ، ވިލިމާލެ އަދި ތިލަފުށީގައި އިންސްޕެކްޝަން ކުރިއަށް ގެންގޮސްފައިވާކަން އެމްއެންޑީއެފުން ފާހަގަކުރެއެވެ.

މި އޮޕަރޭޝަންގައި 15 ދުވަހުގެ މަތިން، އިންސްޕެކްޝަން ޓީމްތަކުން, މީހުން ދިރިއުޅޭ 399 އިމާރާތާއި، ނުރައްކާތެރި ކެމިކަލް ގުދަންކުރާ 144 ގުދަނާއި ކެމިކަލް ވިއްކާ 62 ފިހާރައެއްގެ މަޢުލޫމާތު އެއްކޮށްފައިވާކަމަށާއި، މި އޮޕަރޭޝަނުގައި އެމްއެންޑީއެފް އެފްއާރުއެސްއާއި، އެމްއެންޑީއެފް މާލެ އޭރިއާ ކޮމާންޑް، އަދި މޯލްޑިވްސް ޕޮލިސް ސަރވިސްއިން ބައިވެރިވެފައިވާކަމަށް އެމްއެންޑީއެފުން މައުލޫމާތުދެއެވެ.