ޤައުމީ ބޭންކް، ބޭންކް އޮފް މޯލްޑިވްސްގެ ސީއީއޯ ކަމުގެ މަޤާމަށް ފުރަތަމަ ފަހަރަށް ދިވެއްސަކު އައްޔަނުކޮށްފިއެވެ.
ބީއެމްއެލްގެ ސީއީއޯކަމުގެ މަޤާމަށް މިފަހަރު އައްޔަނުކޮށްފައިވަނީ، މާލީ ދާއިރާގައި 25 އަހަރަށްވުރެ ގިނަދުވަހު ހިދުމަތްކޮށްފައިވާ ކުރިންވެސް ބީއެމްއެލްގެ އިސް މަގާމްތަކެއް ފުރުއްވި މުހައްމަދު ޝަރީފެވެ.
ބީއެމްއެލުން ބުނީ މާދަމައިން ފެށިގެން ޝަރީފް ރަސްމީކޮށް މަޤާމުގެ ޒިންމާތައް އަދާކުރައްވަން ފައްޓަވާނޭ ކަމަށެވެ.
ޝަރީފް ބީއެމްއެލްގައި ހޭދަކުރި މުއްދަތުގައި އޭނާ ވަނީ ބޭންކްގެ ހިދުމަތްތައް ޒަމާނީ ކުރުމުގައި އިސް ދައުރެއް އަދާކުރައްވާފައެވެ. ޝަރީފް ވަނީ ކޯބޭންކިންގ ސިސްޓަމްތައް ގާއިމްކުރުމާއި، ޑެބިޓް އަދި ކްރެޑިޓް ކާޑް ތައާރަފްކުރުމާއި، އަދި ބޭންކުގެ ހިދުމަތްތައް ޑިޖިޓަލް ކުރުމަށް ކުރެވުނު މަސައްކަތްތަކުގެ ދަށުން އިންޓަރނެޓް އަދި މޯބައިލް ބޭންކިން، ސެލްފްސަރވިސް ބޭންކިންގެ އިތުރުން އީކޮމާސް ޕޭމަންޓް ގޭޓްވޭ ތައަރަފްކުރުމަށް އިސް ދައުރެއް އަދާކުރައްވާފައެވެ.
ބީއެމްއެލަށް ހިދުމަތްކުރެއްވި މުއްދަތުގައި ޝަރީފް ވަނީ ބޭންކްގެ ސްޓްރެޓެޖީ ހާސިލްކުރުމަށް ކުރެވުނު މުހިންމު މަސައްކަތުގެ އިސް މޭސްތިރިއެއްގެ ދައުރު އަދާކުރައްވާފައެވެ.
ޝަރީފް ވަނީ އިނގިރޭސިވިލާތުގެ ޔުނިވަރސިޓީ އޮފް މެންޗެސްޓަރ އިން އެމްބީއޭ ހާސިލްކުރައްވާފައެވެ. މީގެ އިތުރުން ލަންޑަން ބިޒްނަސް ސްކޫލުންނާއި ސީއީއޯ އިންނާއި ސީނިއާ އެގްޒެކްޓިވުންނަށް ފަރުމާކޮށްފައިވާ "ސީނިއާ އެގްޒެކްޓިވް ޕްރޮގްރާމް" ވެސް ފުރިހަމަ ކުރައްވާފައެވެ.
މިކަމާ ގުޅިގެން ބީއެމްއެލުން ބުނީ، އެ ބޭންކްގެ ސީއީއޯ މަގާމަށް ދިވެއްސަކު އައްޔަނުކުރުމަކީ ރާއްޖެގެ މާލީ ދާއިރާއަށްވެސް ލިބިގެންދިޔަ ކުރިއެރުމެއް ކަމަށެވެ.
Advertisement
This content is created and paid for by advertisers and does not involve Voice Journalists
