އިސްލާމްދީނުގައި ނަމާދަށް ދެވިފައިވާ އަހައްމިއްޔަތު ކަމަކީ އެކަކަށްވެސް އޮޅިފައި އޮންނާނެ ކަމެއް ނޫނެވެ. އެއީ ޤިޔާމަތްދުވަހުން އެންމެ ފުރަތަމަ ހިސާބު ބެއްލެވޭނެ އަޅުކަމެވެ. އަދި ޝަހާދަތުގެ ދެކަލިމައަށްފަހު، އިސްލާމް ކަމުގެ ދެވަނަ ރުކުނެއްގެ ގޮތުގައި އޮންނަނީވެސް ނަމާދެވެ. ކަންމިހެން ހުރުމުން، އަހަރެމެންގެ ދަރިންގެ ހިތްތަކުގައި ނަމާދަށް ލޯބިޖައްސައި، އެކަމަށް އާދަ ކުރުވުމަކީ ކޮންމެހެން ކުރަންޖެހޭ ކަމެކެވެ. 

މި ލިޔުމުގައި މި ބަލާލަނީ ދަރިންގެ ހިތުގައި ނަމާދަށް ލޯބިޖެއްސުމަށް ކުރެވުދާނެ ބައެއް ކަންކަމަށެވެ. 

ދަރިންނަކީ ބޮޑެތި މީހުން، ޚާއްސަކޮށް މައިންބަފައިން ނަކަލުކުރާ ބައެކެވެ. އެހެން ކަމުން، ބަންގި ދިނުމާއެކު، ކުދިންގެ މައިންބަފައިން، ވުޟޫކޮށް، ނަމާދު ކުރަން އަވަސްވެގަންނަތަން އަމަލުން ދައްކާށެވެ. ތިބާގެ ޙަޔާތުގައި ނަމާދަށް ފަރުވާތެރިވެ، ނަމާދު އޭގެ ވަގުތުގައި އަދާކޮށް، އެންމެ ނަމާދެއްވެސް ނާޅައި، އެންމެ އިސްކަމެއް ނަމާދަށް ދޭ ތަން ދަރިންނަށް ފެންނަ ނަމަ، އެކުދިން ބޮޑުވެގެންދާނީ، ނަމާދުގެ މުހިންމުކަން ދަންނަ، އަދި އެކަމަށް ފަރުވާތެރިވާ ބައެއްގެ ގޮތުގައެވެ. 

ނަބިއްޔާ ޞައްލަالله ޢަލައިހިވަސައްލަމަ ޙަދީޘްކުރައްވާފައިވެއެވެ. ((مُرُوا أَوْلَادَكُمْ بِالصَّلَاةِ وَهُمْ أَبْنَاءُ سَبْعِ سِنِينَ، وَاضْرِبُوهُمْ عَلَيْهَا وَهُمْ أَبْنَاءُ عَشْرٍ، وَفَرِّقُوا بَيْنَهُمْ فِي الْـمَضَاجِعِ))([1]) މާނައީ: “ތިޔަބައިމީހުންގެ ދަރިންނަށް ހަތް އަހަރު ވުމުން އެކުދިންނަށް ނަމާދުކުރުމަށް އަމުރުކުރާށެވެ. އަދި ދިހަ އަހަރުވުމުން (ނަމާދު ނުކޮށްފިނަމަ) އަދަބު ދީގެންވެސް ނަމާދުކުރުވާށެވެ. އަދި އެކުދީންގެ ތަންމަތިތައް ވަކިކުރާށެވެ.”

ހަތް އަހަރުވުމުގެ ކުރިން ނަމާދު ކުރަން ނުޖެހުނު ނަމަވެސް، އޭގެ ކުރިންވެސް، ކުދިންނަށް ނަމާދު ކުރަން އުނގަންނައިދީ އެކަމުގެ މުހިންމުކަން ވިސްނައިދިނުމަކީ މުހިންމު ކަމެކެވެ. 

ގޭގައި ޖާގަ ހުރި ނަމަ، ނަމާދު ކުރަން ވަކި ކޮޓަރިއެއް ޚާއްސަ ކުރާށެވެ. ނުވަތަ ކޮޓަރީގެ ވަކި ތަންކޮޅެއް ހަމައެކަނި ނަމާދު ކުރުމަށް ޚާއްސަކޮށް އެތަނުގައި ނަމާދު ކުރާށެވެ. އަދި އެއީ ނަމާދު ކުރާ ތަން ކަމަށް ވުމުން، އެތަން އަބަދުވެސް ސާފުޠާހިރުކޮށް ބެހެއްޓުމަށް އިރުޝާދު ދޭށެވެ. 

ނަމާދު ވަގުތާއި ނަމާދުތައް އެނގޭ ގޮތަށް ކޮޓަރީގައި ޓޭބަލް އެއް ނުވަތަ ޕޯސްޓަރެއް ތަތްކޮށްފައި ބަހައްޓާށެވެ. އޭރުން ނަމާދުތަކުގެ ވަގުތުތައް އެނގި، ނަމާދުތައް އޭގެ ވަގުތުގައި އަދާކުރުމަށް އިސްކަންދެވޭނެއެވެ. 

މިއާއެކު ”ނަމާދު ގަސް“ އެއް ހަދާށެވެ. ކޮންމެ ނަމާދެއް ވަގުތުގައި ކުރުމަށްފަހު، އެ ގަހުން ފަތެއްގައި ފެހި ކުލަ ޖައްސަން ދަރިފުޅު ގާތު ބުނާށެވެ. އަދި ދަރިފުޅު، ނަމާދު ވަގުތުގައި އަދާކުރުމުން، މާތްالله ދަރިފުޅުގެ އެ ޢަމަލާމެދު ރުހިވޮޑުގެންވާނެކަމަށް ބުނާށެވެ. ހަމަ އެހެންމެ، އެއީ الله ވަރަށް ލޯބިވެވޮޑިގެންވާ ކަމެއް ކަމަށްވެސް ބުނާށެވެ. 

އަދި ނަމާދެއް ލަސްކޮށްފައި ކުރި ނަމަ، ނަމާދު ގަހުގެ ފަތުގައި އޮރެންޖު ކުލަ ޖެއްސުމަށް ބުނާށެވެ. ނަމާދު ލަސްކުރުމަކީ މާތް الله ނުރުއްސަވާ ކަމެއްކަންވެސް ހަނދުމަކޮށްދޭށެވެ. 

މީގެ އިތުރުން، ދަރިފުޅު ނަމާދެއް އަޅައިފިނަމަ، ގަހުގެ ފަތުގައި ރަތްކުލަ ޖެއްސުމަށް ބުނާށެވެ. އަދި، ނަމާދު އެޅުމުގެ ސަބަބުން، މާތްاللهގެ ނުރުއްސެވުމާއި އަޒާބު ލިބޭނެ ކަމަށް ބުނެދީ، ތައުބާވުމަށް ނަސޭހަތްތެރިވާށެވެ.

މާތް الله އަކީ ކޮން ފަރާތެއްކަން ނޭނގި އެކަލާނގެއަށް އަޅުކަން ކުރުމަކީ ފަސޭހަކަމަކަށް ނުވާނެއެވެ. އެހެން ކަމުން ދަރިފުޅު ތުއްތުއިރުން ފެށިގެން، ހުރިހާ އެއްޗެއް ހެއްދެވީ الله ކަމާއި، އެކުދިންގެ ކާނާ އާއި އެނޫންވެސް ބޭނުންވާ ހުރިހާ އެއްޗެއް ދެއްވަނީ الله ކަން ބުނެދޭށެވެ. އޭރުން ކުއްޖާގެ ހިތުގައި ހެއްދެވިވފަރާތަށް ލޯބި ޖެހި، އެކަލާނގެއަށް ކުރެވޭ އަޅުކަންތަކުގައި އިޚްލާސްތެރިވެވޭނެއެވެ.

ރަސޫލާ ޞޢވ ގެ ޙަޔާތްޕުޅުން ފާހަގަކޮށްލެވޭ އެކިއެކި ވާހަކަތައް ދަރިފުޅަށް ކިޔަވައިދޭށެވެ. އެކަލޭގެފާނުގެ ޚުލޤުފުޅާއި އަޚްލާޤުގެ މަތިވެރިކަން އެނގިގެންދާ ވާހަކަ ތަކާއި ނަމާދާއި ގުޅިގެން އައިސްފައިވާ ވާހަކަތައް ކިޔައިދޭށެވެ. ދަރިން އެންމެ ލޯބިވާ އިންސާނާ އަކީ ރަސޫލާ ޞޢވ ކަމަށް ހަދައި، އެކަލޭގެފާނަކީ އެކުދިންގެ ހީރޯއަށް ހަދާށެވެ. އޭރުން އެކަލޭގެފާނު ކުރެއްވި ފަދައިން ނަމާދު ކުރަންވެސް ކުދިން ބޭނުންވާނެ އެވއ.