މި ސަރުކާރު ވެރިކަމާ ހަވާލުވިފަހުން ރާއްޖޭގެ ކުޅިވަރު ވަސީލަތްތައް ގާއިމުކުރުމަށް ފާއިތުވެދިޔަ އަހަރެންހާ ދުވަހު 225 މިލިއަން ރުފިޔާ ހަރަދުކޮށްފައިވާ ކަމަށް ކުޅިވަރާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.

މިރޭ ސޯޝަލް ސެންޓަރުގައި މިރޭ ބޭއްވި "މޯލްޑިވްސް ސްޕޯޓްސް އެވޯޑްސް" ހަފުލާގައި ވާހަކަދައްކަވަމުން މިނިސްޓަރު ރާފިއު ވިދާޅުވީ މި ސަރުކާރުން ކުޅިވަރަށް ބޮޑު ހޭދައެއް ކޮށްފައިވާ ކަމަށާއި އެގޮތުން ފާއިތުވެދިޔަ އަހަރެއްހާ ދުވަހަށް ބަލާއިރުއެއީ ބޮޑު އަދަދެއްކަމަށެވެ.

މިނިސްޓަރު އިތުރަށް ވިދާޅުވީ ރާއްޖޭގެ ކުޅިވަރުގެ ކުރިމަގަށް މި ސަރުކާރުން ޚާއްސަ އިސްކަމެއް ދީގެން އެންމެ ފުރަތަމަ ކުރެވުނު ކަމަކީ ކުޅިވަރުގެ ދިގު ރާސްތާގެ ޕްލޭނެއް އެކުލަވާލުން ކަމަށާއި އެ ޕްލޭނުގައި ހިމެނެނީ ސާކް ސަރަހައްދުން ބޭރުން މެޑަލް ހޯދުމަށް ކުރަންޖެހޭ މަސައްކަތްތައް ދެނެގަނެ، އެކަމަށް ކުރަންޖެހޭ މަސައްކަތާއި، އެކުއެކީގައި ކުރަންޖެހޭ އެންމެހާ ކަންތައްތައް ރާވައި ހިންގާނެ ގޮތުގެ ތަފްސީލު ކަމަށެވެ.

މިނިސްޓަރު އިތުރަށް ވިދާޅުވީ ސާކް ސަރަހައްދުގެ ކޮލިފައިންގެ އެއްވަނަ ހޯދައި، އޮލިމްޕިކްސްއަށް ދީމާ ކޮލިފައިވި ދުވަހަކީ ދިވެހިރާއްޖޭގެ ކުޅިވަރުގެ ތާރީހުގައި ރަން އަކުރުން ފަވާލެވުނު ފަހުރުވެރި ދުވަހެއް ކަމަށާއި އޭގެ އިތުރުން 2026 ވަނަ އަހަރު ޖަޕާނުގައި އޮންނަ އޭޝިއަން ގޭމްސްއަށް ކޮލިފައިވި ފުރަތަމަ ދިވެހި ކުޅިވަރުގެ ޝަރަފު ސާފިން އިން ހޯދުމަކީ ވެސް ފަހުރުވެރި ކާމިޔާބީއެއް ކަމަށެވެ.