އަލް ޢަސްރުގެ "ލޯތަކުގެ ފިނިކަން" ނަމާދު ވޯކްޝޮޕް ރ.މީދޫގައި ބޭއްވުމަށް ނިންމައި، ބައިވެރިވުމުގެ ފުރުސަތު ހުޅުވާލައިފިއެވެ.

އަލް އަސްރުން ވަނީ، މިދިޔަ ޖުލައި މަހުގެ 25 އިން 27 އަށްވެސް މީދޫގައި ބާއްވާފައެވެ. އެ ވޯކްޝޮޕްގައި 50 އަށްވުރެ ގިނަ މީހުން ވަނީ ބައިވެރިވެފައެވެ. 

އަލް އަސްރުން ވޮއިސް އަށް މައުލޫމާތު ދެމުން ބުނިގޮތުގައި، އެ ވޯކްޝޮޕްގައި ބައިވެރި ނުވެވުނު ގިނަ ފަރާތްތަކެއްގެ އެދުމުގެ މަތީން މި މަހުގެ 24 އިން 26 އަށްވެސް އިތުުރު ނަމާދު ވޯކްޝޮޕެއް އެރަށު ބޭއްވުމަށް ނިންމީއެވެ. 

Advertisement

އަލް އަސްރުން އިތުރަށް ބުނީ މި ވޯކްޝޮޕް ބޭއްވުމަށް ހަމަޖެހިފައި ވަނީ 18 އަހަރުން މަތީގެ ފަރާތްތަކަށް ކަމަށެވެ. ވޯކްޝޮޕްގައި ބައިވެރިވާން ބޭނުންވާ ފަރާތްތަކުން 7898784 ނަންބަރަށް ނަމާއި އައިޑީކާޑު ނަންބަރު މެސެޖު ކޮށްގެން ބައިވެރިވެވޭނެ ކަމަށް އަލް-އަސްރުން ބުނެއެވެ. 

ދެދުވަހުގެ މުއްދަތަކަށް ކުރިއަށްގެންދާ މި ވޯކްޝޮޕަކީ ރ.މީދޫ ކައުންސިލާއި އެރަށުގެ ޖަމިއްޔާއެއް ކަމަށްވާ ޔުނައިޓެޑް ފޯ މައި މީދޫ ޔޫތު ޑިވެލޮޕްމެންޓާއި ގުޅިގެން ކުރިއަށްގެންދާ ވޯކްޝޮޕެކެވެ.

ނަމާދާއި ބެހޭގޮތުން ގިނަ އަދި މުހިންމު މައުލޫމާތު ތަކެއް ފޯރުކޮށްދެވޭ މި ވޯކްޝޮޕްގައި ކިޔަވައިދޭނީ ފުންނާބު އުސް ދީނީ ޢިލްމުވެރިޔާ ޑރ.އާދަމް ޝަމީމެވެ.

މި ވޯކްޝޮޕްގައި ނަމާދުގެ މަޤާމް، ޠަހާރަތާއި، ވުޟޫ އަދި ނަމާދު ތަކްބީރުން ފެށިގެން ސަލާމް ދިނުމާ ދެމެދުގައިވާ ޛިކުރުތަކާއި ހަރަކާތްތައް ވެސް ކިޔަވައިދެވެއެވެ. 

އަލް ޢަސްރުން އިތުރަށް ބުނިގޮތުގައި، މި ވޯކްޝޮޕަށްފަހު، ފުރަތަމަ ފަހަރަށް، ”ލޯތަކުގެ ފިނިކަން ނަމާދު ވޯކްޝޮޕް“ގެ ލެވެލް 2 މީދޫގައި ކުރިއަށް ގެންދިޔުމަށް ވަނީ ހަމަޖެހިފައެވެ. ޑރ އާދަމް ޝަމީމް ނަންގަވައިދެއްވާ މި ވޯކްޝޮޕްގައި ބައިވެރިވެވޭނީ ލެވެލް 1 ފުރިހަމަ ކުރާ ބައިވެރިންނަށް ކަމަށް އަލް-ޢަސްރުން މައުލޫމާތު ދެއެވެ.

އަލް އަސްރުން އަންނަނީ، ރަށްރަށުން ރިކުއެސްޓް ކުރުމުން ރަށްރަށުގައި އާއި އޮފީސްތަކުގެ ގައި ވެސް މި ވޯކްޝޮޕް ބާއްވައިދެމުންނެވެ.