ދުނިޔޭގެ ސްޓޮކްޕައިލްގައި އަނގައިން ދޭ ކޮލެރާ ވެކްސިން (އޯރަލް ކޮލެރާ ވެކްސިން) ހުސްވެފައިވާކަމަށް ދުނިޔޭގެ ސިއްހަތާއި ބެހޭ ޖަމިއްޔާ (ޑަބްލިއުއެޗްއޯ) އިން ބުނެފިއެވެ.
ޑަބްލިއުއެޗްއޯ އިން ބުނީ، މިކަމުގެ ސަބަބުން މި ބަލި ހުއްޓުވުމަށް ކުރަމުންގެންދާ މަސައްކަތްތަކަށް ހުރަސްތަކާއި ކުރިމަތިލާން ޖެހިފައިވާކަމަށެވެ.
އެ ޖަމިއްޔާއިން ލަފާކުރާ ގޮތުގައި ކުރިއަށް އޮތް ހަފްތާތަކުގެ ތެރޭގައި ވެކްސިންގެ ޑޯޒްތައް އަލުން ލިބޭނެއެވެ. އެހެންނަމަވެސް، މި ވެކްސިން ހުސްވުމަކީ ބައްޔާއި ދެކޮޅަށް ކުރަމުންދާ މަސައްކަތަށް ބޮޑެތި ގޮންޖެހުންތަކެއް ކުރިމަތިކުރުވާފައިވާ ކަމެއް ކަމަށް ޑަބްލިއުއެޗްއޯއިން ވަނީ ސިފަކޮށްފައެވެ.
ޑަބްލިއުއެޗްއޯ އިން ބުނީ ސެޕްޓެމްބަރު 1 އާއި އޮކްޓޯބަރު 14 އާ ދެމެދު ވެކްސިން ފޯރުކޮށްދިނުމާ ބެހޭ އިންޓަނޭޝަނަލް ކޯޑިނޭޓިން ގްރޫޕަށް ބަންގްލަދޭޝް، ސޫދާން، ނައިޖަރ، އިތިއޮޕިއާ އަދި މިޔަންމާ އިން އޯރަލް ކޮލެރާ ވެކްސިން ފޯރުކޮށްދިނުމަށް އެދިފައިވާ ކަމަށެވެ.
އެ ރިކުއެސްޓްތަކުގެ އަދަދަކީ ޖުމްލަ 8.4 މިލިއަން ޑޯޒް ނަމަވެސް ލިމިޓެޑް ޑޯޒްގެ ސަބަބުން ޝިޕް ކުރެވޭނީ އެންމެ 7.6 މިލިއަން ޑޯޒް ކަން އެ ޖަމިއްޔާއިން ފާހަގަކުރިއެވެ.
އޭޕްރީލް މަހު ގަވީ ވެކްސިން އިއްތިހާދާއި އދ ގެ ކުޑަކުދިންގެ އެޖެންސީ (ޔުނިސެފް) އިން ބުނިގޮތުގައި، ކުރިއަށް އޮތް އަހަރުތަކުގައި އެހެން އުފެއްދުންތެރިންގެ އުފެއްދުންތައް ލިބޭނެ ކަމަށް ބެލެވުނު ނަމަވެސް މިވަގުތު ދުނިޔޭގެ ސްޓޮކްޕައިލްއަށް އަށް އޯރަލް ކޮލެރާ ވެކްސިން ފޯރުކޮށްދެނީ ސައުތު ކޮރެއާގެ ކުންފުނި ޔޫބަޔޮލޮޖިކްސް އިން އެކަންޏެވެ.
Advertisement
This content is created and paid for by advertisers and does not involve Voice Journalists
