އިންޑިއާއާއި މަލާވީއާ ދެމެދު ގުޅުން ބަދަހިކުރުމުގެ އެއްބަސްވުންތަކެއްގައި ސޮއިކޮށްފި

އިންޑިއާއާއި މަލާވީއާ ދެމެދު ގިނަ ދާއިރާތަކަކުން ގުޅުން ބަދަހިކުރުމުގެ އެއްބަސްވުންތަކުގައި ސޮއިކޮށްފިއެވެ.

މި އެއްބަސްވުންތަކުގައި ސޮއިކޮށްފައިވަނީ އިންޑިއާގެ ރައީސާ ޑްރޮޕަޑީ މުރްމޫ މަލާވީއަށް ކުރެއްވި ފުރަމާނަ ދަތުރުފުޅުގައި، މި ހަފްތާ ބަންދުގައެވެ. މުރްމޫ މަލާވީއަށް ވަޑައިގަތީ އެފްރިކާ ބައްރުގެ 3 ޤައުމަކަށް ކުރައްވާ ދަތުރުފުޅުގެ ތެރެއިން، އެންމެ ފަހު މަންޒިލެއްގެ ގޮތުގައެވެ. މަލާވީގެ ކުރިން އެކަމަނާ ވަޑައިގަތީ މުސްލިމް ދެ ޤައުމުކަމަށްވާ އަލްޖީރިއާ އަދި މޮރިޓޭނިއާ އަށެވެ.

Advertisement

މަލާވީގެ ރައީސް ޗަކްވެރާއާއެކު ހުކުރު ދުވަހު މުރްމޫ ވަނީ ބައްދަލުކުރައްވައި، ދެޤައުމުގެ މެދުގައި މަޝްވަރާތައް ބާއްވާފައެވެ. މި މަޝްވަރާތަކަށްފަހު ދެޤައުމުގެ މެދުގައި ސަގާފަތާއި ފަންނު، ޒުވާނުން، ކުޅިވަރު، ބޭސްވެރިކަން ފަދަ ދާއިރާތަކުން ދެޤައުމުގެ ދެމެދުގައި ގުޅުން ބަދަހިކުރުމާ، ގުޅިގެން މަސައްކަތްކުރުމުގެ އެމް.އޯ.ޔޫ ތަކުގައި ސޮއިކޮށްފައިވެއެވެ. އަދި އަތްފައި ނެތް މީހުންނަށް މަސްނޫޢީ އަތާއި ފައި ޖަހައިދޭ މަރުކަޒެއް، އިންޑިއާގެ އެހީގައި މަލާވީގައި ގާއިމްކޮށްދެއްވާނެކަންވެސް އެކަމަނާ އިއުލާންކުރެއްވިއެވެ.

މިއީ އިންޑިއާގެ ރައީސަކު މަލާވީއަށް ކުރައްވާ ފުރަތަމަ ފުރަމާނަ ދަތުރުފުޅެވެ. މި ދަތުރުފުޅުގައި އިންޑިއާގެ ރައީސާ ވިދާޅުވީ މަލާވީއާއެކު ގާއިމްކޮށްފައިވާ 60 އަހަރުގެ ގުޅުމަކީ އިންޑިއާއިން އަބަދުވެސް ބަލައިގަންނަ ގުޅުމެއް ކަމަށެވެ. އަދި އެފްރިކާ ބައްރާއިއެކު އިންޑިއާއިން ގުޅުން ބަދަހިކޮށް، އެހީތެރިކަން ފޯރުކޮށްދެނީ އެފްރިކާ ބައްރުގެ ގައުމުތަކުން އިސްކަންދޭ ކަންކަމަށް ވިސްނައިގެންކަމަށްވެސް އެކަމަނާ ވިދާޅުވީއެވެ.