މިދިޔަ ސަރުކާރުން ހިންގި ބޯހިޔާވަހިކަމުގެ މަޝްރޫއުތައް ކަމަށްވާ "ބިންވެރިޔާ" އަދި "ގެދޮރުވެރިޔާ" ސްކީމުގެ ދަށުން ދޫކުރި ގޯއްޗާއި ފްލެޓް ހަވާލުކުރުން ލަސްވާތީ، އެމްޑީޕީން މަޖިލިސް ކައިރީ މުޒާހަރާ ކޮށްފިއެވެ.

ފުލެޓާއި ގޯތި ހަވާލުކުރުން ލަސްވާތީ، ކަންބޮޑުވުން ފާޅުކުރުމުގެ ގޮތުން ރައްޔިތުންގެ މަޖިލީހުގެ އިދާރާ ކައިރީގައި ކުރިއަށްގެންދާ މި މުޒާހަރާގައި މަޖިލީހުގައި ތިއްބަވާ އެމްޑީޕީގެ ޕީޖީ ގްރޫޕްގެ މެމްބަރުންވެސް ވަނީ ބައިވެރިވެވަޑައިގެންފައެވެ.

މުޒާހަރާގެ ބައިވެރިން ބުނީ، މަޖިލިސް ސަރަހައްދުގައި އެ ކަންބޮޑުވުންތައް ހިއްސާކުރަމުން ދަނީ މަޖިލީހުގެ މެންބަރުންނަށް ރައްޔިތުންގެ އަޑު އިއްވުމަށްޓަކައި ކަމަށެވެ.

Advertisement

އެމްޑީޕީން މަޖިލިސް ކައިރީގައި ކުރިއަށް ގެންދާ މުޒާހަރާ-- ފޮޓޯ: އެމްޑީޕީ

މަޖިލިސް ކުރިމަތީގައި މުޒާހަރާ ކުރަމުންދާއިރު، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ބިންވެރިޔާ ސްކީމްގެ ދަށުން ހުޅުމާލޭން ދޫކުރަން ނިންމި ގޯތިތަކުގެ ތެރެއިން  29 އޮގަސްޓު 2024 ވީ ބުރާސްފަތި ދުވަހު 13 ގޯތި އަދި ސެޕްޓެމްބަރު މަހުގެ 1 ވަނަ ދުވަހު 10 ގޯއްޗެއް އެ ގޯތިތަކުގެ ވެރިފަރާތްތަކާއި ހަވާލުކޮށްފައެވެ.

އެއާއިއެކު، މި ސްކީމްގެ ދަށުން ޖުމްލަ 648 ގޯތި ވެރިފަރާތްތަކާ ހަވާލުކުރެވިފައިވާ ކަމަށް މިނިސްޓްރީން ވަނީ ހާމަކޮށްފައެވެ.

ހަމައެއާއިއެކު، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ހިންގި ގެދޮރުވެރިޔާ ސްކީމުގެ ދަށުން ދޫކުރި 4000 ފްލެޓް ލިބޭ މީހުންގެ ލިސްޓު ބާތިލު ނުކުރުމަށް އެދި މަޖިލީހަށް ޕެޓިޝަނެއް ހުށަހަޅާފައިވާއިރު، އެ ކަމާއި ގުޅިގެން ޖަވާބުދާރީ ވުމަށް މިނިސްޓަރ ހައިދަރު ހާޒިރުކުރުމުން، މިނިސްޓަރު ވަނީ އޮކްޓޯބަރު މަސް ނިމޭއިރު، އާންމުކުރައްވާނެ ކަމަށް ވިދާޅުވެފައެވެ.

ހަމައެއާއިއެކު، ކޮމިޓީގައި ވާހަކަފުޅު ދައްކަވަމުން މިނިސްޓަރު ހައިދަރު ވަނީ، ފްލެޓް ލިސްޓް އުވާލަން ގަސްދުނުކުރައްވާ ކަމަށާއި، އެހެންނަމަވެސް، ފުލެޓްތައް އޭގެ ހައްގުވެރިންނަށް ލިބޭކަން ޔަގީން ކުރެއްވުމުގެ މަސައްކަތް ކުރައްވާ ކަމަށް ވިދާޅުވެފައެވެ.