ވެލާނާ އިންޓަނޭޝަނަލް އެއާޕޯޓު ތަރައްގީކޮށް އަޕްގްރޭޑްކުރުމަށް ޗައިނާގެ އެކްސްޕޯޓް އިމްޕޯޓް ބޭންކް (އެގްޒިމް) ބޭންކުން 2015ވަނަ އަހަރު ނެގި 378 މިލިއަން ޑޮލަރުގެ ލޯނު ދެއްކުމަށް ބޭނުންވާ 75 މިލިއަން ޑޮލަރު ރިފައިނޭންސް ކޮށްފިއެވެ.

މިދިޔަ މަހުގެ 23ވަނަ ދުވަހު ސޮއި ކުރެވުނު މި އެއްބަސްވުމާގުޅޭ ސިޓީ، އިއްޔެ އޮތް މާލިއްޔަތު ކޮމިޓީގެ ބައްދަލުވުމުގައި ވަނީ ހާމަކޮށްފައެވެ.

އެ ސިޓީގައިވާ ގޮތުން 74،767،599.98 ޑޮލަރު ރިފައިނޭންސް ކުރުމަށް އެއްބަސްވުމެއްގައި ސޮއިކޮށްފައިވާއިރު، މި ދަރަނި ރިފައިނޭންސްކުރި މައިގަނޑު ސަބަބުތަކަކީ މެދުރާސްތާގައި ދައްކަންޖެހޭ ދަރަނި ދެއްކުމުގައި ދައުލަތަށް ލުއިތަކެއް ހޯދުމެވެ. އަދި ދައުލަތުގެ ރިޒާވުން ކުރަންޖެހޭ ހޭދަ ކުޑަކުރެވި ދައުލަތުގެ މާލީ ހާލަތު ރަނގަޅުކުރުމެވެ.

Advertisement

ދަރަނި ރިފައިނޭންސްކުރުމަކީ ނަގައިފައިވާ ދަރަންޏެއް ދެއްކުމަށް އިތުރު ދަރަންޏެއް ނެގުމެވެ. އަދި ކުރީގެ ލޯނުތަކުގެ ޝަރުތުތައް އާ ލޯނަށް ބަދަލުވުމެވެ.

ޗައިނާއިން ނަގާފައިވާ މި ލޯނުގެ ދަށުން ދައްކަންޖެހޭ ފުރަތަމަ އިންޓަރެސްޓް ޕޭމަންޓު ދައްކަން ޖެހެނީ 21 ޖެނުއަރީ 2025ގައެވެ. އެއަށްފަހު ކޮންމެ އަހަރެއްގެ 21 ޖެނުއަރީ އަދި 21 ޖުލައިގައި އިންޓަރެސްޓް ޕޭމަންޓުތައް ދައްކަން ޖެހޭނެއެވެ. 

ދަރަނި އަނބުރާ ދައްކައި ނިންމަން ޖެހެނީ 2030ވަނަ އަހަރުގެ ނިޔަލަށެވެ.