ހިޔާ ޓަވަރުގެ އެޕާޓްމަންޓެއްގައި މަޔަކަށް އަނިޔާކޮށް މަރުގެ އިންޒާރުދިން މައްސަލައެއްގައި ހައްޔަރުކުރި މީހާގެ ބަންދަށް ހުޅުމާލެ މެޖިސްޓްރޭޓް ކޯޓުން 10 ދުވަސް ޖަހައިފިއެވެ.

މި މައްސަލައާ ގުޅޭގޮތުން ހައްޔަރުކޮށްފައިވަނީ، ހ. އެހަޑަ، އުމުރުން 28 އަހަރުގެ މުހައްމަދު އިސްމާއިލްއެވެ.

 މުހައްމަދު އިސްމާއީލްް ހައްޔަރުކުރީ އޭނާގެ މަންމައަށް މަރުގެ އިންޒާރުދީ އަނިޔާކުރުމުގެ އިތުރުން މަންމައަތުން ފޭރުމުގެ ތުހުމަތުގައެވެ.

Advertisement

އެއާއިއެކު ފުލުހުން ބުނީ، އޭނާގެ ބަންދާ މެދު ގޮތެއް ނިންމަން ހުޅުމާލެ މެޖިސްޓްރޭޓް ކޯޓަށް ހާޒިރުކުރުމުން 10 ދުވަހަށް ބަންދުގައި ބަހައްޓަން އަމުރު ކޮށްފައިވާކަމަށެވެ.

ފުލުހުން އިއްޔެ ހާމަކުރި ގޮތުގައި، ހިޔާ 13 ގެ އެޕާޓްމަންޓަކުން މީހަކު ރޯއަޑު އިވޭތީވެ، އިއްޔެ އިރުއޮއްސި ގަޑިން 18:17 ހާއިރު ފުލުހުންނަށް ރިޕޯޓް ކުރުމާއި ގުޅިގެން ފުލުހުން އެޕާޓްމަންޓަށް ދިއުމުން ދޮރުހުޅުވީ އަންހެނެކެވެ.

އެ އަންހެންމީހާ އާއި ހަވާލާދީ ފުލުހުން ބުނި ގޮތުގައި، މަންމަ މަރާލާނެކަމަށް ބުނެފައިވަނީ ވަޅިންނެވެ.

އަންހެންމީހާ ހޮސްޕިޓަލަށް ގެންދިއުމަށްފަހު ފަރުވާދީ ވަނީ ގެއަށްދޫކޮށްލާފައެވެ. ފުލުހުން ގެންދަނީ މި މައްސަލަ ތަހުގީގުކުރަމުންނެވެ.