ޓައިވާން ކައިރީގައި ޗައިނާއިން އަސްކަރީ ތަމްރީނުތަކެއް ހިންގިތާ އެއް ދުވަސް ނުވަނީސް، މިއަދު އެގައުމާ ދިމާއަށް ޗައިނާގެ ކަނޑުގެ މަނަވަރުތަކެއް ދަތުރުކުރަމުންދާކަމަށް ޓައިވާނުން ބުނެފިއެވެ.

ހަނގުރާމަމަތީ ޖެޓްތައް އުފުލާ ކެރިއަރއަކާއި އިތުރު މަނަވަރުތަކެއް ޓައިވާނުން ކޮންޓްރޯލް ކުރާ ޕްރަޓާސް ޖަޒީރާތަކުގެ ކައިރިން ޓައިވާން ކަނޑުއޮޅިއާއި ދިމާއަށް ދަތުރުކުރަމުންދާކަމަށް ޓައިވާނުގެ ޑިފެންސް މިނިސްޓްރީއިން ބުނެއެވެ. ލިއައޮނިންގް ނަންދީފައިވާ މި އެއަރކްރާފްޓް ކެރިއަރ ވަނީ މިދިޔަ ހަފްތާގައި ޓައިވާނުގެ ވަށައިގެންވާ ކަނޑުގެ ސަރަހައްދުގައި ޗައިނާއިން ބޭއްވި ބާރު ދައްކާލުމުގެ އަސްކަރީ ތަމްރީންތަކުގައިވެސް ބައިވެރިވެފައެވެ.

މި ތަމްރީންތަކުގައި ކަނޑުގެ އުޅަނދުތަކުގެ އިތުރުން ގިނަ އަދަދެއްގެ އަސްކަރީ ޖެޓްވެސް ޗައިނާއިން ބޭނުންކުރިއެވެ. ޗައިނާގެ އަސްކަރީ މަނަވަރުތަކުގެ ހަރަކާތްތައް މޮނީޓަރ ކުރަމުންދާކަމަށާއި، އަޅަން ޖެހޭ ފިޔަވަޅުތައް އަޅާފައިވާކަމަށް ޓައިވާނުން ބުނެއެވެ. އެހެންނަމަވެސް ތަފްސީލެއް އެގައުމުން ހާމައެއް ނުކުރެއެވެ.

ޗައިނާއާއި ޓައިވާނާއި ދެމެދު އޮންނަ ޓައިވާން ކަނޑުއޮޅިން ނިމުނު ހަފްތާ ބަންދުގައި ކެނެޑާގެ މަނަވަރަކާއި އެމެރިކާގެ މަނަވަރެއްވެސް ދަތުރުކޮށްފައިވެއެވެ.

މި މަނަވަރުތަކުގެ ދަތުރަކީ ޓައިވާން ކަނޑުއޮޅިއަކީ ބައިނަލްއަގްވާމީ މެރިން ޓްރެފިކަށް ވަދެވޭނެ ބައިނަލްއަގްވާމީ ސަރަހައްދެއްކަން ޗައިނާއަށް ހަނދާކޮށްދިނުމަށް އެމެރިކާއިން ދޭތެރެދޭތެރެއިން ކުރަމުންދާ ދަތުރުތަކުގެ ތެރެއިން ކުރި ދަތުރުރެކެވެ.

ޗައިނާއިން ވަނީ އެމެރިކާއާއި ކެނެޑާގެ މި އަމަލު ކުށްވެރިކޮށް، މިއީ އެސަރަހައްދުގެ ހަމަޖެހުން ނަގާލުމަށް އެގައުމުތަކުން ކުރި ކަމެއް ކަމަށް ސިފަކޮށްފައެވެ