ބޭންކް އޮފް މޯލްޑިވްސް (ބީއެމްއެލް) އިން ރާއްޖެއިން ބޭރުގައި ކިޔަވާ ދަރިވަރުންނަށް ބޭރު ފައިސާގެ މުޢާމަލާތުގެ ލިމިޓް އިތުރުކޮށްފިއެވެ.
މިގޮތުން 2024 ވަނަ އަހަރުގެ ނޮވެމްބަރ 1 އިން ފެށިގެން، ރާއްޖެއިން ބޭރުގައި ކިޔަވާ ދަރިވަރުންނަށް އެ ދަރިވަރުން ދިރިއުޅޭ ޤައުމުގައި މަހަކު 1,200 އެމެރިކާ ޑޮލަރުގެ މުޢާމަލާތް ކުރެވޭނެއެވެ.
"ޑޮލަރު ލިބުމުގައި ދަތިތަކެއް ހުރި ނަމަވެސް، ރާއްޖެއިން ބޭރުގައި ކިޔަވާ ދަރިވަރުން ދިމާވާ ދަތިތައް އަޅުގަނޑުމެން ގަބޫލުކުރަން. މިއަދުގެ މި އިޢުލާނަކީ ރާއްޖެއިން ބޭރުގައި ތިބޭއިރު އެ ދަރިވަރުންގެ ދުވަހުން ދުވަހަށް ބޭނުންވާ މާލީ ކަންކަމަށް އިސްކަންދީ އެހީތެރިވުމަށް އަޅުގަނޑުމެން ކުރާ މަސައްކަތުގެ ހެއްކެއް."
ބީއެމްއެލްގެ ސީއީއޯ މުޙައްމަދު ޝަރީފް
ބީއެމްއެލް އިން ބުނި ގޮތުގައި، މި އިތުރުކުރެވުނު ލިމިޓް ބޭނުންކުރުމަށް، ދަރިވަރުން އޮންލައިން ޕޯޓަލްއެއް މެދުވެރިކޮށް ބޭންކުގައި ރަޖިސްޓަރީ ވާންޖެހޭނެއެވެ. އަދި ބޭނުންވާ ލިޔެކިޔުންތައް ހުށަހަޅަންޖެހޭނެއެވެ.
ރަޖިސްޓަރީ ވުމާ ގުޅޭ އިތުރު މަޢުލޫމާތު ކުރިއަށް އޮތް ތަނުގައި ހިއްސާކުރެވޭނެ ކަމަށް ބޭންކުން ބުނެފައިވެއެވެ.
ބޭންކް އޮފް މޯލްޑިވްސްއިން ޑޮލަރުގެ ހާލަތު ވަޒަންކުރަމުން ގެންދާނެ ކަމަށާއި، ކުރިމަގުގައި އަންނަ ބަދަލުތަކާ ގުޅޭގޮތުން ކަސްޓަމަރުންނަށް މަޢުލޫމާތު ދެމުން ގެންދާނެ ކަމަށްވެސް ބުނެފައިވެއެވެ.
Advertisement
This content is created and paid for by advertisers and does not involve Voice Journalists
