ރާއްޖޭގެ މަތީތައުލީމް ދާއިރާގައި ބާއްވާ އެންމެ ބޮޑު ފުޓްސަލް މުބާރާތް "10 ވަނަ އެމްއެންޔޫއެސްޔޫ ފުޓްސަލް ފިއެސްޓާ 2024" ގެ ކުޅުން މިރޭ ފަށައިފިއެވެ. 

ހުޅުމާލޭ ރެހެންދި ފުޓްސަލް ދަނޑުގައި މުބާރާތް ފެއްޓުމުގެ ގޮތުން މިރޭ ބޭއްވުނު ކުލަގަދަ ރަސްމިއްޔާތް ޝަރަފުވެރިކޮށްދެއްވީ ދިވެހިރާއްޖޭގެ ހަޔާ އެޑިއުކޭޝަން މިނިސްޓަރ ޑރ. މަރިޔަމް މާރިޔާ އެވެ. އަދި މުބާރާތް ފެށުމުގެ ގޮތުން ކުޅެވުނު ވިކްޓްރީ ޝީލްޑް މެޗުގައި ވާދަކޮށްފައި ވަނީ އެންމެ ފަހުގެ ޗެންޕިއަން މޯލްޑިވްސް ނެޝަނަލް ޔުނިވާސިޓީ ބިޒްނަސް ސްކޫލް (އެމްއެންޔޫބީއެސް) އާއި 2022 ވަނަ އަހަރުގެ ޗެންޕިއަން މެޕްސް ކޮލެޖެވެ.

މިއަހަރުގެ މުބާރާތުގައި ޖުމްލަ 30 ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ދެޑިވިޝަނަކަށް ބަހާލައިގެންނެވެ. އެގޮތުން ފިރިހެން ޑިވިޝަނުގައި 18 ޓީމު ބައިވެރިވެފައިވާއިރު، އަންހެން ޑިވިޝަނުގައި 12 ޓީމަކުން ވަނީ ބައިވެރިވެފައެވެ. އަދި ދެޑިވިޝަނުގެ މެޗުތައްވެސް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ޓީމުތައް ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ.

24 އޮކްޓޯބަރު 2024 އިން 08 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ އަންހެން އަދި ފިރިހެން ޑިވިޝަންގެ ޗެންޕިއަން ޓީމަށް 10،000 އަދި ރަނަރަޕް ޓީމަށް 5،000 ރުފިޔާގެ ފައިސާގެ އިނާމެއް ހުށައަޅާފައިވާއިރު، މުބާރާތުގެ މެޗުތައް ކުޅުމަށް ހަމަޖެހިފައިވަނީ ހުޅުމާލޭ ރެހެންދި ފުޓްސަލް ދަނޑުގައެވެ.

މީގެ އިތުރުން މިއަހަރުގެ މުބާރާތުގެ މީޑިއާ ޕާޓްނަރަކީ ވޮއިސް ސްޕޯޓްސް އެވެ.