ހެބްރޯންގައި އިސްރާއީލް ސިފައިންގެ އަތްދަށުގައި އަނިޔާވެރިކަމާއެކު ޝަހީދުކޮށްލި ފަލަސްތީނުގެ މަޝްހޫރު އެކްޓިވިސްޓް ޒިޔާދު އަބޫ ހިލައިލްގެ ހުވަފަތް އަނބިމީހާ ބަސްމާ (64 އަހަރު) އޭނާގެ ހަޔާތުގެ ވާހަކަތަކާއި އިސްރާޢީލުގެ ނިރުބަވެރިން އޭނާ ޝަހީދު ކޮށްލި ގޮތުގެ ވާހަކަތައް ކިޔައިދީފިއެވެ.

އަލްޖަޒީރާ އިން ރިޕޯޓުކުރި ގޮތުގައި އިސްރާއީލް ސިފައިން، އަބޫ ހިލައިލްގެ ގެއަށް ވަދެ އޭނާއަށް އަނިޔާކޮށް މަރާލާފައިވަނީ، ނިރުބަވެރިން މިފަހުން ޣައްޒާގައި ފެށި ޤަތުލު ޢާއްމަށް އަހަރެން ފުރުނު ދުވަހު، މި އަހަރުގެ އޮކްޓޯބަރ މަހުގެ 7 ވަނަ ދުވަހުއެވެ. އަބޫ ހިލައިލް އަކީ އިސްރާއީލްގެ ބިންފޭރުމާއި، ނުހައްގުން ފަލަސްތީނަށް ވެރިވެގެން ހިންގަމުންދާ ޖަރީމާތަކާއި ދެކޮޅަށް ސުލްހަވެރި އިހުތިޖާޖުތައް ކުރުމަށް މަޝްހޫރު މީހެކެވެ. އޭނާގެ އެންމެ މަޝްހޫރު ވެފައިވަނީ "ބިހިއްމިޝް!" (މާނައަކީ "މައްސަލައެއް ނެތް")ގެ ނަމުންނެވެ.

އަބޫ ހިލައިލްކޮށްފައިވާ އިހްތިޖާޖުތަކުގެ ތެރެއިންވެސް ފާހަގަކޮށްލެވޭ އެއް އިހުތިޖާޖުގައި 10،000 އަށްވުރެ ގިނަ މީހުން ބައިވެރިވެފައިވާއިރު، އެ އިހްތިޖާޖުގައި ގޮވާލީ އިސްރާއީލުން ރަހީނުކޮށް ޝަހީދުކޮށްލާފައިވާ ފަލަސްތީނުގެ މުސްލިމުންގެ ހަށިގަނޑުތައް އަނބުރާ ދިނުމަށެވެ. މި އިހުތިޖާޖުގެ ސަބަބުން 17 ހަށިގަނޑު އަނބުރާ ލިބުނެވެ.

އަބޫ ހިލައިލް އާއި ބަސްމާ (64 އަހަރު) އަށްވަނީ 8 ފިރިހެން ދަރިންނާއި 6 އަންހެން ދަރިން ލިބިފައެވެ. އޭގެ ތެރޭގައި އެއްމާބަނޑު ކުދިންވެސް ހިމެނެއެވެ. އެކުދިންފެ ތެރެއިން މިހާރު ދިރިތިބި ދަރިންނަކީ އިރުވާނު މޫސާއާއި މައިސާ (42 އަހަރު)، މުޙައްމަދު (41 އަހަރު)، މުރާދު (39 އަހަރު)، ޢީސާ (37 އަހަރު)، ސަނާ (36 އަހަރު)، އިޔާދު - ޖިހާދުގެ އިރުވާނު - (34 އަހަރު)، މަޙްމޫދު (33 އަހަރު)، ބަދުރު (32 އަހަރު)، އިރުވާނު ނިދާއާއި ފިދާ (31 އަހަރު)، މުއައްޔަދު (30 އަހަރު) އަދި ޔާސްމީން (29 އަހަރު) އެވެ.

އަބޫ ހިލައިލްގެ ހުވަފަތް އަނބިމީހާ ބަސްމާ: ފޮޓޯ/ އަލްޖަޒީރާ

އަބޫ ހިލައިލްގެ ދެ ދަރިން ޝަހީދުވެގެން ދިޔައީ އިސްރާއީލުގެ ނިރުބަވެރިންގެ ހަމަލާގެ ސަބަބުންނެވެ. އޭގެތެރެއިން އެކަކީ ޖިހާދެވެ. އުމުރުން އެންމެ 7 މަހުގައި ޖިހާދު ޝަހީދުވެގެންދިޔައީ 1989 ވަނަ އަހަރު ޔަހޫދީން ދިން ހަމަލާއެއްގައި ލިބުނު އަނިޔާއަށް ފަރުވާ އެކުއްޖާ ހޮސްޕިޓަލަށް ދިއުމަށް ހުރަސްއެޅުމުން އަނިޔާއަށް ފަރުވާ ނުލިބި އެ ވޭނުގައެވެ. 

އަނެއް ދަރިފުޅު އަޙްމަދު ޝަހީދުވެގެންދިޔައީ 17 އަހަރުގައި 2017 ވަނަ އަހަރު ރާމަاللهގައި އިސްރާއީލުގެ ހަމަލާއެއްގެ ސަބަބުންނެވެ. އޭނާގެ އަނެއް ދަރިފުޅު ބަދުރުގެ މެޔަށް ބަޑިން ހަމަލާ ދިނުމަށްފަހު ހައްޔަރުކޮށް، އަނިޔާކޮށް، ތިން އަހަރަށް ޖަލަށްލެވުނެވެ.

އޮކްޓޯބަރު 7 ވަނަ ދުވަހުގެ ފަތިހު، އިސްރާއީލުގެ ސިފައިން އަބޫ ހިލައިލްގެ ގޭގެ ތެރެއަށް ވަދެގަތެވެ.

"ގާތްގަނޑަކަށް ފަތިހު 3 ގައި އަޅުގަނޑުމެންނަށް ސިފައިންގެ އަޑު އިވުނީ އެމީހުން ގެ ވަށައިގެން ހިޞާރުކޮށް ދޮރު ހުޅުވުމަށް އަމުރުކުރަމުންދިޔަ،" ބަސްމާ ބުންޏެވެ.

އޭނާގެ ދަރިފުޅު މުއައްޔަދު ދޮރު ހުޅުވަން ދިޔުމުން ވަގުތުން އޭނާއަށް ހަމަލާދިން ކަމަށާ ސިފައިން އޭނާއަށް އަމުރުކުރީ އޭނާގެ ބޮޑުބޭބެގެ ގެއަށް އެމީހުން ގެންދިއުމަށް ކަމަށް ބަސްމާ ކިޔައިދިނެވެ. 

އެ ވަގުތު، އެހެން ސިފައިން އެ ގެއަށް ވަދެ އަބޫ ހިލައިލް ހޯދައި އޭނާގައިގައު އަނިޔާވެރިކަމާއެކު ތަޅަން ފެށި ކަމަށާ، އޭނާ ހިތުގެ ބައްޔެއް ހުރިކަމަށް ތަކުރާރުކޮށް ބުނަމުން ދިޔަނަމަވެސް، ނިރުބަވެރި، ސިފައިންގެ ތެރެއިން އެކަކު، ގަސްދުގައި ހިތް އިންނަ ފަޅީގައި، މޭމަތީގައި ބާރަށް ޖެހި ކަމަށް ބަސް ބުންޏެވެ.

އަދި އެފަހުން، ސިފައިންގެ އަމުރާއެއްގޮތަށް އަބޫ ހިލައިލް އޭނާގެ ގެއިން ނުކުމެ ސިފައިންގެ ފަހަތުން ދާން އުޅުނު ވަގުތު، ސިފައިންގެ ތެރެއިން އެކަކު އެގޭގެ ބަރު ދަގަނޑު ދޮރުން އޭނާގެ މޭމަތީގައި ބާރަށް ޖެހުމުން އޭނާ ވެއްޓުނު ކަމަށެވެ.

ބަސްމާ ބުނިގިތުގައި އަބޫ ހިލައިލް ވަނީ ކުރިން ހިތުގެ އެތައް ފަރުވާއެއް ހޯދާފައެވެ. އޭގެ ތެރޭގައި ހިތުގެ ލޭހޮޅިއަށް ކެތީޓަރު ލުން ހިމެނެއެވެ.

ދޮރުން ޖެހުމުގެ ސަބަބުން ވެއްޓި، ބައިގަޑިއިރަށްވުރެ ގިނަ ވަގުތު އޭނާ ހޭނެތިފައި އޮތް. ނަމަވެސް ގެ ވަށައިގެން ސިފައިން ތިބީ. އެމީހުން އެމްބިއުލާންސް އަޅުގަނޑުމެން ގާތަށް އައުން ހުއްޓުވަމުން ދިޔަ،" ބަސްމާ ބުންޏެވެ.

އޭނާ ހޭއެރި ވަގުތު، "އަޅުގަނޑު އޭނާ އަށް ގޮވަމުންދިޔައިން. އެވަގުތު، އަޅުގަނޑުގެ އަތްމަތީގައި އޮވެ އޭނާ ޝަހާދަތް ކިއީ، އެފަހުން އޭނާގެ ފުރާނަ ދިޔައީ. އެވަގުތު އަޅުގަނޑުގެ ހަށިގަނޑުންވެސް ފުރާނަ ދިޔަ ކަހަލަ އިހުސާސެއް ކުރެވުނު،" ބަސްމާ ބުންޏެވެ.

އަބޫ ހިލައިލްގެ ޖަނާޒާގައި އޭނާގެ އަނބިމީހާ: ފޮޓޯ/ އަލްޖަޒީރާ

ބަސްމާ ކިޔައިދިން ގޮތުގައި އޭނާގެ ފިރިމީހާ އަކީ ދީލަތި، މަޑުމައިތިރި، ހިތްވަރުގަދަ އަދި މިސްކިތުގައި އަބަދުވެސް ނަމާދުކުރަމުން ދިޔަ މީހެކެވެ.

"އޭނާ އަހަންނަށް ކެތްތެރިކަން ދަސްކޮށްދިން. އަދި އޭނާގެ ބަލި، މަންމައަށް ފަރުވާތެރިވުމަށް އަހަންނަށް ނަސޭހަތްތެރިވި،" އޭނާ ބުނެއެވެ.

އަބޫ ހިލައިލްގެ ޖަނާޒާ: ފޮޓޯ/ އަލްޖަޒީރާ

އަބޫ ހިލައިލްގެ ޖަނާޒާގައި އެތައް ހާސް މީހުން ބައިވެރިވިއެވެ. އަދި އިތުރު މީހުން އައުމަށް މަސައްކަތްކުރި ނަމަވެސް އިސްރާއީލް ސިފައިން ހުރަސްއެޅުމުގެ ސަބަބުން އެމީހުންނަށް ނުދެވުނީއެވެ.