ޔަހޫދީން ހިންގަމުންދާ ގަތުލުއާއްމާއި ގުޅިގެން، އުތުރު ޣައްޒާގައި ހިދުމަތްދެމުންދިޔަ ހަމައެކަނި ހޮސްޕިޓަލްކަމަށްވާ ކަމަލް އަދުވާންގައި މަސައްކަތް ކުރަމުންދިޔަ މުއައްޒަފުންނާއި ގުޅުން ކެނޑިފައިވާކަމަށް ދުނިޔޭގެ ސިއްޙީ ޖަމްޢިއްޔާ (ޑަބްލިޔުއެޗްއޯ) އިން ބުނެފިއެވެ.

ޑަބްލިއުއެޗްއޯއިން މިފަދައިން ބުނީ، އިސްރާއީލުގެ ސިފައިން އެ ސަރަހައްދުގައި ހިންގަމުންދާ އުދުވާންތައް ވަރުގަދަކޮށްފައިވާ ދަނޑިވަޅެއްގައެވެ.

މިގޮތުން އެ ޖަމިއްޔާގެ ޑިރެކްޓަރ ޖެނެރަލް ޓެޑްރޮސް އަދަނޮމް ގެބްރެއިސަސް ވިދާޅުވީ، ޔަހޫދީ ފައުޖުން އުތުރު ޣައްޒާގައި ހުރި ކަމާލް ޢަދްވާން ހޮސްޕިޓަލަށް ވަދެގަތްކަމުގެ ޚަބަރު މިއަދު ހެނދުނު ލިބުމާއިއެކު، އެތަނުގައި މަސައްކަތްކުރަމުންދާ މުއައްޒަފުންނާއި ގުޅުން ކެނޑިފައިވާކަމަށާއި، އެތަނުގައި ފަރުވާދެމުންދާ މީހުންނާއި ހޮސްޕިޓަލުގެ ހިމާޔަތުގައި ތިބި މީހުން އަދަދަށް ބަލާއިރު މިއީ ވަރަށް ކަންބޮޑުވާން ޖެހޭ ކަމެއް ކަމަށެވެ.

Advertisement

ގެބްރެއިސަސް އިތުރަށް ވިދާޅުވީ، އިއްޔެ ރޭގެ ވަގުތެއްގައި، ޑަބްލިއުއެޗްއޯއާއި އެހެނިހެން ފަރާތްތައް ގުޅިގެން އެ ސަރަޙައްދުގައި ގަތުލުއާއްމު ހިންގަމުން ދަނިކޮށް، ކަމާލް ޢަދްވާން ހޮސްޕިޓަލަށް ވާސިލުވެ، 23 ބަލިމީހުންނާއި، 26 މުއައްޒަފުން އަލް-ޝިފާ ހޮސްޕިޓަލަށް ބަދަލުކުރެވުނުކަމަށެވެ.

ކަމަލް އަދްވާން ހޮސްޕިޓަލަށް ޔަހޫދީ ބައިގަނޑުން ގަދަކަމުން ވަދެގަތްއިރު، އެމީހުން ހުއްޓުމެއްނެތި ދެމުންގެންދާ ލާއިންސާނީ ހަމަލާތަކުގެ ސަބަބުން އެތަނުގައި 200 އަށް ވުރެ ގިނަ ބަލިމީހުން ފަރުވާ ހޯދަމުން އަންނައިރު، އެއީ އެތައް ސަތޭކަ މީހުން ހިމާޔަތް ހޯދަމުން އަންނަ ތަނެކެވެ.