ރާއްޖެއަށް އެތެރެކުރަން އުޅުނު ގިނަ އަދަދެއްގެ ސިނގިރޭޓު، މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ.
މިކަމާއި ގުޅިގެން ކަސްޓަމްސް އިން ނެރުނު ބަޔާނެއްގައި ބުނީ، މިތަކެތި އަތުލައިގެންފައިވަނީ ހޯކްސް ޕްރައިވެޓް ލިމިޓެޑްގެ އެޖެންޓްކަމުގެ ދަށުން މި މަހުގެ 24 ވަނަ ދުވަހުގެ ރާއްޖެ އައި "އެމްޓީ ހޯކްސް ޖަވާހިރު" ނަމަކަށް ކިޔާ ބޯޓަކުން ގިނަ އަދަދެއްގެ ސިނގިރޭޓު އެތެރެކުރަން އުޅޭކަމުގެ މައުލޫމާތު މި މަހުގެ 25 ވަނަ ދުވަހުރޭ ލިބުމާއި ގުޅިގެން ހިންގި އޮޕަރޭޝަނެއްގައި ކަމަށެވެ.
ކަސްޓަމްސްއިން ބުނީ، އެ ބޯޓުން ހޯކްސް ޕްރައިވެޓް ލިމިޓެޑްގެ ދޯންޏެއް ކަމަށްވާ "ހޯކްސް ރޯދި" އަށް އެތަކެތި އަރުވައިގެން ތިލަފުއްޓަށް ގެންދިޔަ ކަމަށާއި އެތަނުން އެ ކުންފުނީގެ ނަމުގައި ރަޖިސްޓްރީކޮށްފައިވާ ޓްރަކަކަށް އެތަކެތި އެރުވި ކަމަށެވެ.
އެތަކެތި ބޭލުމަށް މަސައްކަތްކޮށްފައިވަނީ މި މަހުގެ 25 ވަނަ ދުވަހުގެ ރޭ 10:00 ހާއިރު ތިލަފުށީގައި ހުންނަ ހޯކްސްގެ ބޯޓުޔާޑަށް ކަމަށާއި، އެތަކެތި ބޭލި ބޯޓުޔާޑުގައި އިތުރު ސިނގިރޭޓް ހުރިކަމަށް ޝައްކުކުރެވިގެން ކޯޓު އަމުރުގެ ދަށުން މިހާރު އެތަން ބަލައި ފާސްކުރަމުންދާ ކަމަށް ކަސްޓަމްސް އިން ބުނެއެވެ.
އެގޮތުން، މިހާތަނަށް އެ ބޯޓުޔާޑުގައި ހުރި އެކޮމޮޑޭޝަނުންނާއި ވޯކްޝޮޕުން "މެންޗެސްޓަރ" ބްރޭންޑުގެ ގާތްގަނޑަކަށް 1695 މިލިޔަން ސިނގިރޭޓު ފެނިފައިވާ ކަމަށް ކަސްޓަމްސްއިން ވަނީ ހާމަކޮށްފައެވެ.
ކަސްޓަމްސްއިން ބުނީ، މި މައްސަލަ، ރާއްޖެއަށް ސިއްރުން މުދާ އެތެރެކުރުމަށް އުޅުނުކަމަށް ތުހުމަތުކޮށް ތަހުގީގު ކުރަމުންދާކަމަށާއި، ރާއްޖެއަށް އެތެރެކުރެވޭ މުދަލުގެ ލިޔެކިޔުން ނިންމުމާއި މުދާ ބަލައިފާސްކުރުމުގެ މަރުހަލާތަކުގައި ކަސްޓަމްސްއަށް ލިބޭ އިންޓެލިޖެންސް މައުލޫމާތާއި ހިރާސް ނިޒާމުގެ ތެރެއިން ކަނޑައެޅޭ ގޮތެއްގެ މަތިން އަމަލުކުރާނެކަމަށެވެ.
Advertisement
This content is created and paid for by advertisers and does not involve Voice Journalists
