އެއްވެސް ވަރަކަށް ފުލުހުންގެ ޚިދުމަތް ޤާއިމް ނުކުރެވި އޮތް 25 ރަށެއްގައި އެ ޚިދުމަތް ޤާއިމް ކުރެވިފައިވާ ކަމަށް ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރ އިހްސާން މަޖިލީހަށް ހާޒިރު ކޮށް، ސުވާލު ކުރުމުގެ ފުރުސަތު ހުޅުވާލުމުން ކުޅުދުއްފުށީ ދެކުނު ދާއިރާގެ މެންބަރު ފަރުހަތު މުހައްމަދު ވަނީ ކުޅުދުއްފުށީގައި ޒަމާނޫ ފެންވަރުގެ ޕޮލިސް ސްޓޭޝަނެއް އެޅުމުގެ މަސައްކަތް ފެށޭނެ އިރަކާއި ގުޅޭގޮތުން ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން މިނިސްޓަރު އިޙްސާން ވިދާޅުވީ، ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވެރިކަމާއި ހަވާލުވެވަޑައިގެންނެވި އިރު، ރާއްޖޭގައި އެއްވެސް ވަރަކަށް ފުލުހުންގެ ޚިދުމަތް ޤާއިމް ނުކުރެވޭ 72 ރަށް އޮތް ކަމަށެވެ.

Advertisement

”އޭގެ ތެރެއިން 25 ރަށެއްގައި މިހާރު ވާނީ ފުލުހުންގެ ޤާއިމް ކުރެވިފައި“ މިނިސްޓަރ އިހްސާން ވިދާޅުވިއެވެ. 

މިއާއެކު އިހްސާން ވިދާޅުވީ، ފުލުހުންގެ ޚިދުމަތް ޤާއިމް ކުރެވިފައި ހުރި ރަށް ރަށުގައި ހުރި ޕޮލިސް އިންފްރާސްޓްރަކްޗަރ ރަނގަޅު ފެންވަރަކަށް ގާއިމް ކުރުމުގެ ޕްރޮޖެކްޓްތައް އެކުލަވާލައްވަމުންދާ ކަމަށެވެ.

އެގޮތުން ތަރުތީބު ކިރެވިފައިވާނީ މިވަގުތު ފުލުހުންގެ ޚިދުމަތް ހުރި ތަންތަނުގައި ހުރި ދަތި ތަކަށް ބަލައިގެން ކަމަށްވެސް އިހްސާން ފާހަގަކުރެއްވިއެވެ.