މެންޗެސްޓަރ ޔުނައިޓެޑްގެ ހެޑް ކޯޗްގެ މަގާމުގައި ހުރި، އެރިކް ޓެން ހާގް މަގާމުން މިއަދު ވަކިކޮށްފިއެވެ.
މެންޗެސްޓަރ ޔުނައިޓެޑުން ވަނީ ތެން ހާގް މަގާމުން ވަކިކުރިކަން ރަސްމީކޮށް ބުނެފައެވެ. ޓެން ހާގް ވަކިކުރިކަން ހާމަކޮށް ޔުނައިޓެޑުން ނެރުނު ސްޓޭޓްމަންޓުގައި ބުނީ، އެ ޓީމުގައި ޓެން ހާގް އަދާކުރަމުން އައި ޒިއްމާތަކުން މިއަދުން ފެށިގެން ވަކިވެފައިވާކަމަށެވެ.
މެމްޗެސްޓަރ ޔުނައިޓެޑުން ބުނީ، އެޓީމުގައި ހޭދަކުރި މުއްދަތުގައި ޓެން ހާގްގެ ފަރާތުން ލިބުނު އެހީތެރިކަން ފާހަގަކުރާ ކަމަށާއި، އޭނާއަށް އުފާވެރި ކުރިމަގަކަށް އެދޭކަމަށެވެ.
ޓެންހާގް މެންޗެސްޓަރ ޔުނައިޓެޑާ ގުޅުނީ، 2022 ވަނަ އަހަރުގެ އޭޕްރިލްމަހުގެ ތެރޭގައެވެ. ޔުނައިޓެޑުގއި ހޭދަކުރި މުއްދަތުގައި ޓެން ހާގް ވަނީ އެޓީމަށް މިދިޔަ އަހަރުގެ ކަރަބޯ ކަޕާއި، މިއަހަރުގެ އެފްއޭކަޕް ހޯދައިދީފައެވެ. ޓެންހާގް މެންޗެސްޓަރ ޔުނައިޓެޑުން ވަކިކުރީ އެޓީމް ނެރެމުންދާ ދަށް ނަތީޖާތަކުގެ ސަބަބުންނެވެ.
ޕްރިމިއާ ލީގްގައި ޔުނައިޓެޑް އެންމެފަހުން ވެސްޓްހޭމް ޔުނައިޓެޑާ ދެކޮޅަށް ކުޅުނުމެޗުން ބަލިވެފައިވާއިރު، ޕްރިމިއާ ލީގްގައި އެޓީމް މިހާރު އޮތީ 11 ޕޮއިންޓާއެކު 14 ވަނައިގައެވެ.
ޕްރިމިއާ ލީގްގައި މެންޗެސްޓަރ ޔުނައިޓެޓް އެންމެފަހުން ކުޅުނު 5 މެޗްގެ ތެރެއިން މޮޅުވީ ބެންފޯޑާ ދެކޮޅަށް ކުޅުނުމެޗުންނެވެ. ޓެން ހާގް ޓީމާ ވަކިވުމުން ދެން މެންޗެސްޓަރ ޔުނައިޓެޑްގެ ސީނިއާ ޓީމުގެ ކޯޗެއްގެ ގޮތުގައި ވަގުތީގޮތުން ހަމަޖައްސާފައިވަނީ އެޓީމްގެ ކުރީގެ ލެޖެންޑް އަދި އެސިސްޓަންޓް ކޯޗް، ރުޑް ވޭން ނިސްޓަލްރޫއީ އެވެ.
Advertisement
This content is created and paid for by advertisers and does not involve Voice Journalists
