ކޫއްޑޫ އެއާޕޯޓްގެ ރަންވޭ މަރާމާތުކުރުމުގެ މަސައްކަތް ނިމި، އެއާޕޯޓަށް ފްލައިޓް ޖައްސަން ފަށައިފިއެވެ.ރަންވޭ މަރާމާތައްފަހު ފުރަތަމަ ފްލައިޓް ކޫއްޑޫއަށް ޖައްސާފައިވަނީ މިއަދު ހެނދުނެވެ. އެއީ ކާޑެއްދޫއިން އައި މޯލްޑިވިއަންގެ ފްލައިޓެކެވެ.
މިކަމާ ގުޅޭގޮތުން ވޮއިސްއާ މައުލޫމާތު ހިއްސާކުރަމުން، ކޫއްޑޫ އެއާޕޯޓް ހިންގާ ކުންފުނީގެ އޮފިޝަލަކު ވިދާޅުވީ، ރަންވޭގައި ކުރަންޖެހުނު މަރާމާތުގެ މަސައްކަތް ނިމިފައިވާކަމަށެވެ.
އެހެންކަމުން މިއަދުން ފެށިގެން ކޫއްޑޫއަށް ކުރިއެކޭ އެއްގޮތަށް އޮޕަރޭޝަން ކުރިއަށްދާނޭކަމަށް އޭނާ ވިދާޅުވިއެވެ.
މޯލްޑިވިއަނުންވެސް ވަނީ ކޫއްޑޫއަށް ދަތުރުތައް ފެށިކަން ވޮއިސްއަށް ޔަގީންކޮށްދީފައެވެ.
ކޫއްޑޫ އެއާޕޯޓަށް ކުރަމުން އައި ދަތުރުތައް ހުއްޓާލާފައިވަނީ އޮކްޓޯބަރުމަހުގެ އެއްވަނަ ދުވަހުއެވެ. މޯލްޑިވިއަނުނުން ބުނެފައިވަނީ ކޫއްޑޫ އެއާޕޯޓަާށް ދަތުރުތައް ކުރުން ހުއްޓާލަންޖެހުނީ، އެއާޕޯޓްގެ ރަންވޭ ބޭނުންކުރަން އެކަށީގެން ނުވާތީއެވެ.
ކޫއްޑޫ އެއާޕޯޓް ހުޅުވާފައިވަނީ 2012 ވަނަ އަހަރެވެ. އެ އެއާޕޯޓަކީ އެ ސަރަހައްދުގައި އޮތް އެންމެ ބިޒީ އެއާޕޯޓެވެ. މައުލޫމާތު ލިބިފައިވާ ގޮތުގައި ކޫއްޑޫ އެއާޕޯޓް ރަންވޭ ރަނގަޅަށް މަރާމާތުނުކުރާތާ ވަނީ، ގިނަ އަހަރުތަކެއް ވެފައެވެ. ރަންވޭ މަރާމާތަށް ފަރުވާކުޑަވެގެން މޯލްޑިވިއަންގެ ބައެއް ފްލައިޓްތަކަށް ގެއްލުންވެސް ލިބިފައި އެބަހުއްޓެވެ.
Advertisement
This content is created and paid for by advertisers and does not involve Voice Journalists
