ކުރީގެ ސަރުކާރުން ރޭވުންތެރިކަމެއްނެތި ތައްޔާރުކުރި ގުޅިފަޅުގެ އެލްޔޫޕީ (ލޭންޑް ޔޫސް ޕްލޭން) އިން ފެނިގެންދަނީ ޖާގަ ދަތި ކުޑަކޮށްޓެއްގެ މަންޒަރެއް ކަމަށެވެ.

މި ސަރުކާރުން ތައްޔާރު ކުރި ގުޅިފަޅުގެ ލޭންޑްޔޫސް ޕްލޭނާއި ކުރީ ސަރުކާރުގެ ލޭންޑްޔޫސް ޕްލޭންގެ ފޮޓޯއެއް ހިއްސާކޮށް އެކްސްގައި ކުރި ޕޯސްޓެއްގައި ހަމްދާން ޝަކީލް ވިދާޅުވީ، އަދުގެ ރައީސް ޑރ. މުޙައްމަދު މުޢިއްޒުގެ ބެއްލެވުމުގެ ދަށުން ތައްޔާރުކުރެވުނު އެލްޔޫޕީއިން ފެނިގެންދަނީ ޖާގަ ތަނަވަސް، ޒަމާނީ ސިޓީއެއްގެ މަންޒަރު ކަމަށެވެ.

"މި ސަރުކާރުން ދަނީ ރައްޔިތުންނާ ގުޅުން ހުރި މިކަހަލަ ހުރިހާ މުހިންމު ކަމެއްގައި ރައްޔިތްޔިތުންނާ ގުޅިގެން ރޭވުންތެރިކަމާއެކު މަސައްކަތް ކުރަމުން،" ހަމްދާން ވިދާޅުވިއެވެ.

Advertisement

ގުޅީފަޅުގައި ތަރައްގީކުރާ ސިޓީގެ ލޭންޑް ޔޫސް ޕްލޭންގައި ދިރިއުޅުމަށް ދޫކުރާ ގޯއްޗާއި ސޯޝަލް ހައުސިން އަށް ބޮޑު ސަރަހައްދެއް ކަނޑައަޅާފައި ވެއެވެ. އަދި އެ ސިޓީގައި ދިރިއުޅޭ ފަރާތްތަކަށް ބޭނުންވާނޭ ހިދުމަތްތައް ފޯރުކޮށްދިނުމަށް ވެސް ބިން ކަނޑައަޅާފައި ވެއެވެ. މިގޮތުން ތައުލީމީ ހިދުމަތާއި ސިއްހީ ހިދުމަތުގެ އިތުރުން އިންޑަސްޓްރިއަލް މަސައްކަތަށާއި ސިޓީ ހޮޓާ ތަރައްގީކުރުމަށް ވަކި ސަރަހައްދުތައް ކަނޑައެޅިފައި ވެއެވެ.

މީގެ އިތުރުންވެސް، ގުޅީފަޅުގައި ދިރިއުޅޭ ފަރާތްތަކަށް ހިތްފަސޭހަ ދިރިއުޅުމެއް ހޯދައިދިނުމުގެ ބޭނުމުގައި ހިތްގައިމު ޕާކުތަކާއި، ކުޅިވަރުކުޅޭ ސަރަހައްދުތައް ތަރައްގީ ކުރުމަށް ޕްލޭންގައި ކަނޑައެޅިފައި ވެއެވެ.