ފަލަސްޠީނުގެ ބިމުން ފެންނަމުންދާ އަސަރު ގަދަ މަންޒަރުތަކާއެކު، މޫސާ ޝިފާޢު ކިޔާފައިވާ ”ކަލަކުވޭ ބިރުވެތިވޭ“ މަދަހައިގެ އޮފިޝަލް ވީޑިއޯ ނެރެފިއެވެ. މި މަދަހައިގެ ވީޑިއޯ ނެރެފައިވަނީ އިސްލާމިކް ރިދަމް ޔޫޓިޔުބް ޗެނަލްގައެވެ. 

މި މަދަހަ އަކީ ވަރަށް ގިނަ މީހުންގެ މެދުގައި މަގުބޫލު ކަމެއް ލިބުނު މަދަހައަކަށް ވާއިރު، މަދަހައިގެ ވީޑިއޯ އެއް ނެރެފައި މިވަނީ، ގިނަ ބައެއްގެ އެދުމުގެ މަތީން ކަމަށް ޝިފާޢު ވަނީ ބުނެފައެވެ.

އަދި މިކަން ހަގީގަތަކަށް ހެދުމަށް އިންޓަނޭޝަނަލް އެއިޑް ކެންޕެއިނާއި އިސްލާމިކް ރިދަމް އިން ވެދިން އެހީއަށް އޭނާ ވަނީ ޚާއްސަ ޝުކުރެއް އަދާކޮށްފައެވެ.

Advertisement

މި މަދަހައިގެ ވީޑިއޯގައި، ތަފާތު ގްރެފިކް އެނިމޭޝަން ބޭނުން ކޮށްގެން ފަލަސްތީނުގެ ބިމުން، ފެންނަމުންދާ ހިތްދަތި އަދި ބިރުވެރި މަންޒަރުތައް ދައްކުވައިދީފައިވެއެވެ. 

ކަލަކުވޭ ބިރުވެތިވޭ މަދަހައިގެ ވީޑިއޯއެއް ނެރެފައި މިވަނީ، ”ކަލަކުވޭ ބިރުވެތިވޭ“ ނަމުގައި އައްޝައިޚް ޑރ އާދަމް ޝަމީމްގެ ދަރުހެއްވެސް މި ހޮނިހިރު ދުވަހު ދިނުމަށް ހަމަޖެހިފައި ވަނިކޮށެވެ. އެގޮތުން އެ ރޭ 20:45ގައި، ހުޅުމާލޭގެ ރުއްގަނޑު 2 ސަރަހައްދުގައި އޮންނަ މި ދަރުސް ބަލަންދާ ފަރާތްތަކުގެ ތެރެއިން ނަސީބުވެރި ފަރާތަކަށް އައިފޯން 16 ޕްރޯ މެކްސްއެއް ދިނުމަށް ވަނީ ހަމަޖެހިފައެވެ.

އަލްޢަޞްރުން މަޢުލޫމާތު ދިންގޮތުގައި، މި ދަރުސް ޓީ.ވީ.އެމް، ދާރިސް ޓީ.ވީ އަދި އަލްޢަޞްރުގެ ފޭސްބުކް ޕޭޖް މެދުވެރިކޮށް ލައިވްކޮށް ދައްކާނެއެވެ.

އަދި ޚާއްޞަކަމެއްގެ ގޮތުގައި، ދަރުހަށް ހާޒިރުވެ ދަރުސް ނިމެންދެން މަޑުކުރާ ފަރާތްތަކުގެ މެދުގައި ނެގޭ ގުރުއަތުން ހޮވޭ ފަރާތަކަށް އައިފޯން 16 ޕްރޯ މެކްސްއެއް ހަދިޔާ ކުރުމަށްވެސް ވަނީ ހަމަޖެހިފައެވެ.

މި ގުރުއަތުގައި ބައިވެރިވުމަށް ޝަރުތު ހަމަވާނީ ދަރުހަށް ހާޒިރުވެ ރަޖިސްޓްރީކުރާ ފަރާތްތައް ކަމުން ވީހާވެސް ގިނަ ފަރާތްތަކުން ދަރުހަށް އައުމަށް އަލް-ޢަޞްރުން ވަނީ ދަޢުވަތު ދީފައެވެ.