ޣައްޒާގެ އުތުރުގައި ނިރުބަވެރިން ހިންގި ގަތުލުއާއްމެއްގައި 84 މީހުން ޝަހީދުކޮށްލައިފިއެވެ.

ޔަހޫދީ ފައުޖުން ވައި މަގުން ދިން ހަމަލާތަކުގައި ޝަހީދުވި މީހުންގެ ތެރޭގައި 50 ކުޑަކުދިން ހިމެނޭކަމަށް ޣައްޒާގައި ހަރަކާތްތެރިވަމުންދާ މީޑިއާ އޮފިޝަލުން މައުލޫމާތުދެއެވެ.

ޣައްޒާގެ ހެލްތު މިނިސްޓްރީން ބުނީ، މި ލާއިންސާނީ ހަމަލާތަކުގައި 158 އަށް ވުރެ ގިނަ މީހުން ޒަހަމްވެފައިވާއިރު، ބިމާއި ހަމަވެފައިވާ އިމާރާތްތަކުގެ ދަށުގައި އެތައް ބަޔަކު ތާށިވެފައިވާކަމަށެވެ.

Advertisement

މީގެ އިތުރުންވެސް، ހައްދުފަހަނައަޅާފައިވާ ޔަހޫދީ ފައުޖުން ޣައްޒާގެ ބެއިތު ލަހްޔާގައި އަށް ވެސް ހަމަލާދީ، 40 މީހުން ޒަހަމްކޮށްލާފައިވާކަން މިނިސްޓްރީން ފާހަގަކުރިއެވެ.

މިދިޔަ އަހަރުގެ އޮކްޓޫބަރު 7 އިން ފެށިގެން ޔަހޫދީން ޣައްޒާގައި ހިންގަމުން އަންނަ އުދުވާނަށް އަހަރެއް ވެފައިވާއިރު، އެމީހުން ހިންގަމުން އަންނަ "އޮޕަރޭޝަންތައް" ފުޅާކޮށް، ލާއިންސާނީ އެތައް ހަމަލާތަކެއް އަންނަނީ ދެމުންނެވެ.

މިދިޔަ އަހަރުން ފެށިގެން ޔަހޫދީން ޣައްޒާއަށް މެދުނުކެނޑި ދެމުން އަންނަ ހަމަލާތަކުގައި  42,603 މީހުން ޝަހީދުވެފައިވާއިރު، 99,795 މީހުން ވަނީ ޒަހަމްވެފައެވެ.