ހުޅުމާލެ ފޭސް ދޭއް ހިޔާ 13 ޓަވަރު ކައިރީ ހުންނަ ސްޓެލްކޯގެ ޓްރާންސްފޯމަރު ބަހައްޓާފައި ހުރި ތަނަށް ވައްކަންކުރަން ވަނުމުގެ ތުހުމަތުގައި ހައްޔަރު ކުރި މީހާގެ ބަންދަށް 30 ދުވަސް ޖަހައިފިއެވެ.
ފުލުހުން ހާމަކުރިގޮތުގައި، މިދިޔަ އާދިއްތަ ދުވަހު 05:30 ގެ ވަގުތެއްގައި ޓަވަރު 13 ކައިރީ ހުންނަ ސްޓެލްކޯގެ ފޯމަރު ބަހައްޓާފައި ހުންނަ ތަނުގެ އެތެރެއަށް މީހަކު ވަދެ ވައްކަންކުރަން އުޅޭކަމުގެ ރިޕޯޓެއް ވަނީ ލިބިފައެވެ.
އެއާއިއެކު، މި މައްސަލައާއި ގުޅިގެން ފުލުހުން ހައްޔަރުކޮށްފައިވަނީ، ނ.މާޅެންދޫ, ފެހިއައްސޭރި އުމުރުން 32 އަހަރުގެ އަހުމަދު ރިސްފާނެވެ.
ފުލުހުން މިއަދު ބުނީ މައްސަލައިގައި ހައްޔަރުކުރި ރިސްފާނުގެ ބަންދަށް އެންމެ ފުރަތަމަ ޖެހި 3 ދުވަސް ހަމަވުމާއި ގުޅިގެން އިތުރު 30 ދުވަހަށް ބަންދު ކުރުމަށް ކޯޓުން އިއްޔެ އަމުރުކޮށްފައިވާ ކަމަށެވެ.
ސްޓެލްކޯއިން މީގެ ކުރިން ފޯމަރުތައް ބަހައްޓާފައި ހުންނަ ތަންތަނަށް ނުވަނުމަށް އިލްތިމާސްކޮށްފައިވާއިރު، އެ ކުންފުނިން ހުޅުމާލެ ފޭސް ދޭއްގައި ބަހައްޓާފައިހުރި ޓްރާންސްފޯމަރަކުން ވައްކަންކުރަން އުޅުނު މީހަކު މިއަހަރުގެ މާޗްމަހުގެ ތެރޭގައި ވަނީ މަރުވެފައިވާކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
